ដោយ៖តុលា
![](https://cambodiaflashnews.com/wp-content/uploads/2021/06/top-banner.gif)
អភិបាលអ៊ុយក្រែនបាននិយាយថា ជនស៊ិវិល៣នាក់បានស្លាប់ និង១០នាក់ផ្សេងទៀតរងរបួស ក្រោយរុស្ស៊ីបើកការវាយប្រហារទូកជម្លៀសមនុស្សពីទឹកជំនន់នៅក្នុងតំបន់ឃើសនភាគខាងត្បូង។
តាមសេចក្តីរាយការណ៍បន្តពីរ៉យទ័រ លោក Oleksander Prokudin ជាអភិបាលតំបន់ Kherson របស់អ៊ុយក្រែនបាននិយាយថា កងកម្លាំងរុស្ស៊ីកំពុងព្យាយាមដោយចេតនា ដើម្បីរំខានដល់កិច្ចប្រឹងប្រែងជួយសង្គ្រោះរបស់យើង។ លោក Prokudin បាននិយាយនៅលើកញ្ចក់ទូរទស្សន៍អ៊ុយក្រែនថា “ថ្ងៃនេះ ពួកភេរវករបានបើកការវាយប្រហារលើទូកចំនួន ៣ ដែលត្រូវបានប្រើដើម្បីជួយសង្គ្រោះមនុស្ស ២១ នាក់ពីច្រាំងទន្លេដែលលិចទឹក (ភាគខាងកើត)” ។ “ស្ទើរតែទាំងអស់នៃពួកគេសុទ្ធតែជាមនុស្សចាស់ និងមនុស្សដែលពិបាកក្នុងការបម្លាស់ទី។ ទាហានរុស្ស៊ីបានបាញ់ទៅលើមនុស្សទាំងនេះនៅពីខាងក្រោយ”។
ជាលទ្ធផល មនុស្ស ៣ នាក់បានស្លាប់ និង ១០នាក់បានរងរបួស រួមទាំងមន្ត្រីអនុវត្តច្បាប់ពីរនាក់របស់អ៊ុយក្រែន ក្នុងអំឡុងពេលជម្លៀសចេញពីផ្នែកដែលគ្រប់គ្រងដោយរុស្ស៊ីនៃតំបន់ Kherson ទៅកាន់ផ្នែកដែលគ្រប់គ្រងដោយអ៊ុយ ក្រែន។
ប្រធានាធិបតីអ៊ុយក្រែន លោក Volodymyr Zelenskiy បានថ្កោលទោសចំពោះឧប្បត្តិហេតុនេះ និងបានចោទប្រកាន់ម្តងហើយម្តងទៀតថា រុស្ស៊ីគឺជាអ្នកទទួលខុសត្រូវចំពោះការបំផ្លាញទំនប់វារីអគ្គិសនីបណ្តាលឲ្យជន់លិចទីក្រុង។ មិនមានការទទួលស្គាល់ពីរុស្ស៊ីឡើយចំពោះហេតុការណ៍នេះ៕
ប្រភព៖REUTERS