ដោយ៖ សហការី
ក្មេងស្រីជនជាតិអាម៉េរិកម្នាក់ស្ទើរតែគ្មានជីវិតរស់ទៅហើយ ក្រោយនាងត្រូវបានត្រីឆ្លាមខាំ នៅពេលដែលនាងបានចុះលេងទឹកសមុទ្រជាមួយមិត្តភក្តិ។
Ella Reed អាយុ ១៣ឆ្នាំ ជាក្មេងស្រីជំទង់ដ៏ក្លាហានដែលបានរួចផុតជីវិត ពីការវាយប្រហាររបស់ត្រីឆ្លាមដ៏សាហាវនៅឆ្នេរសមុទ្រ Florida ។នាងបានវិលត្រលប់ទៅសមុទ្រវិញជាមួយនឹងក្រុមអ្នកស្រាវជ្រាវ ដើម្បីប្រឡូកក្នុងទឹកដាក់ស្លាកសញ្ញាជាប់នឹងព្រុយត្រីឆ្លាម។ នេះបើតាមការចុះផ្សាយរបស់ញូវយ៉កប៉ុស្តិ៍ កាលពីថ្ងៃទី ១០ ខែមិថុនា។
គេបានបញ្ជាក់ទៀតថា កាលពីខែមុន Ella Reed អាយុ ១៣ឆ្នាំ បានអង្គុយលេងក្នុងទឹករាក់ៗ ជាមួយមិត្តភក្តិនៅជិតកន្លែងសំចតតាមឆ្នេរសមុទ្រ Fort Pierce ។ នៅពេលនោះដែរមានត្រីឆ្លាម bull ប្រវែង ៤ ហ្វីត បានផុសចេញពីក្នុងទឹក ក៏បានខាំនាងពីចំហៀងខ្លួនតែម្តង។ ក្មេងស្រីដែលរងការវាយប្រហារដោយត្រីឆ្លាម បានខិតខំតទល់នឹងការប្រហារនោះ ដោយនាងបានវាយចំក្បាលរបស់វា ហើយប្រើដៃម្ខាងទៀតការពារពោះរបស់នាង។ ការវាយប្រហារដ៏សាហាវនេះ បានធ្វើឲ្យក្មេងស្រីរងរបួសចំនួន ១៩ថ្នេរ នៅលើពោះ លើដៃ និងលើជើងរបស់នាង។
បន្ទាប់ពីជាសះស្បើយហើយនោះ ក្មេងដ៏ក្លាហានរូបនេះត្រូវអ្នកស្រាវជ្រាវនៅសាកលវិទ្យាល័យ Nova Southeastern អញ្ជើញឲ្យចូលរួមជាមួយពួកគេ នៅក្នុងបេសកកម្មដាក់ស្លាកត្រីឆ្លាមបន្ទាប់ពីដឹងថា Reed ជាសិស្សថ្នាក់ទី៨ ហើយនាងចង់ក្លាយជាអ្នកជីវវិទូសមុទ្រម្នាក់ ដោយនាងបាននិយាយថា “នៅពេលដែលខ្ញុំបានទទួលការអញ្ជើញឲ្យទៅដាក់ស្លាកត្រីឆ្លាម ខ្ញុំពិតជារំភើបខ្លាំងណាស់”។ អ្នកវិទ្យាសាស្ត្រស្រាវជ្រាវ Derek Burkholder បាននិយាយថា ក្រុមរបស់គាត់មានការជឿជាក់លើសម្ថភាព Reed គឺដោយសារតែនាងធ្លាប់មានបទពិសោធន៍ជាវិជ្ជមាន ជាមួយសត្វសាហាវក្នុងទឹក។
លោក Burkholder បាននិយាយថា “យើងគិតថាបេសកម្មដំបូងបង្អស់របស់នាង ប្រហែលជាមិនសូវល្អនោះទេ” ។ “យើងចង់ឲ្យបេសកកម្មទីពីររបស់នាងជាមួយនឹងត្រីឆ្លាម ទទួលបានលទ្ធផលវិជ្ជមានឲ្យបានច្រើនជាងនេះបន្ថែមទៀត”។ Reed បានជួយដាក់ស្លាកជាប់នឹងព្រុយរបស់ត្រីឆ្លាម និងបោះនុយឲ្យវា ហើយនាងក៏បានមុជទៅក្នុងទឹកជាមួយនឹងត្រីឆ្លាម និងថែមទាំងចាប់ត្រីឆ្លាមដែលហែលកាត់ទូករបស់ពួកគេទៀតផង៕
