ដោយ៖វិចិត្រ
ភ្នំពេញ៖អគ្គិភ័យយ៉ាងសន្ធោសន្ធៅបានលេបត្របាក់ផ្ទះចំនួន២ខ្នងផ្ទះ អស់ទាំងស្រុងនៅភូមិមិត្តភាព សង្កាត់ព្រែកឯង ខណ្ឌច្បារអំពៅ កាលពីរសៀលថ្ងៃទី៩ ខែមិថុនា ឆ្នាំ២០២៣នេះ។
សមត្ថកិច្ចបានឱ្យដឹងថា ស្ត្រីម្ចាស់ផ្ទះរងគ្រោះឈ្មោះ ភិន ស្រីម៉ៅ អាយុ៣៧ឆ្នាំ ជាជាងកាត់ដេរ ។ មុនកើតហេតុគេឮសំឡេងផ្ទុះចេញពីផ្ទះសង់ពីឈើលើ ថ្មក្រោម គេសង្ស័យឆ្លងចរន្តអគ្គិសនី។បន្ទាប់មកក៏មានអណ្ដាតភ្លើងឆេះឡើងបង្កការភ្ញាក់ផ្អើលដល់អ្នកជិតខាងនិងរាយការណ៍ទៅអាជ្ញាធរមូលដ្ឋានឱ្យជួយហៅរថយន្តពន្លត់អគ្គិភ័យមកបាញ់ទឹកពន្លត់។
ក្រោយមកអាជ្ញាធរមូលដ្ឋាន និងកម្លាំងអន្តរាគមន៍បង្ការពន្លត់អគ្គិភ័យបានចេញរថយន្ត ជាច្រើនគ្រឿងដើម្បីបាញ់ទឹកពន្លត់។ករណីអគ្គិភ័យនេះជំនាញបានបាញ់ទឹកអស់ទឹកចំនួន៨រថយន្ត ទើបភ្លើងរលត់ទៅវិញដោយមិនរាលដាលដល់ផ្ទះផ្សេងនិងបង្កគ្រោះថ្នាក់ដល់មនុស្សទេ។ចំពោះការខូចខាត គឺផ្ទះ១ខ្នងសង់ពីឈើលើថ្មក្រោមខូចខាតទាំងស្រុងនិងផ្ទះល្វែង១ខ្នងទៀតខូចខាតជាងពាក់កណ្តាលជាមួយទ្រព្យសម្បត្តិជាច្រើន៕
