ដោយ៖ គង់ហេង
កំពង់ចាម៖ សម្តេចក្រឡាហោម ស ខេង ឧបនាយករដ្ឋមន្ត្រី បានមានប្រសាសន៍ថា៖ លោក STEFAN MESSERER ឯកអគ្គរដ្ឋទូតអាល្លឺម៉ង់ប្រចាំកម្ពុជា បានដឹកនាំប្រតិភូចុះសិក្សាស្វែងយល់ អំពីការកសាងធនធានមនុស្ស វិស័យនគរបាលនៅកម្ពុជា ដើម្បីឆ្លើយតបតាមសំណើរបស់ក្រសួងមហាផ្ទៃនាពេលកន្លងមក។
សម្តេចឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានមានប្រសាសន៍ដូច្នេះ នៅក្នុងឱកាសដែលសម្តេចអញ្ជើញជាអធិបតីក្នុងពិធីសម្ពោធសមិទ្ធផលថ្មីៗ និងពិធីបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី១៧ លើកទី១ ដែលមានសិស្សនគរបាលជ័យលាភីចំនួន ១៨៥ នាក់នៃសាលានគរបាលជាតិភូមិភាគ២ ខេត្តកំពង់ចាម នៅព្រឹកថ្ងៃទី ៨ មិថុនានេះ។
សម្តេចក្រឡាហោមបានមានប្រសាសន៍ថាៈ ថ្ងៃនេះជាថ្ងៃពិសេស ដោយមានឯកអគ្គរដ្ឋទូតអាល្លឺម៉ង់ និងសហការីប្រតិភូមកចុះសិក្សាកិច្ចការនគរបាលកម្ពុជាយើង គឺដើម្បីរៀបចំនូវផែនការសហប្រតិបត្តិការជាក់លាក់ ទាក់ទងទៅនឹងការបណ្តុះបណ្តាលពង្រឹងសមត្ថភាពនគរបាលគឺជាអ្វីដែលយើងបានស្នើទៅកាន់ទូតសហព័ន្ធអាល្លឺម៉ង់កាលពីអាណតិ្តមុន។
សម្តេចបានមានប្រសាសន៍បន្តថាៈ សូមយកឱកាសនេះថ្លែងអំណរគុណយ៉ាងជ្រាលជ្រៅ និងសូមស្វាគមន៍យ៉ាងកក់ក្តៅចំពោះឯកអគ្គរដ្ឋទូតអាល្លឺម៉ង់លោក STEFAN MESSERER និងសហការីបានចំណាយពេលវេលាដ៏មានតម្លៃចូលរួមក្នុងពិធីដ៏មានសារសំខាន់។ នេះជាការបញ្ជាក់ឱ្យឃើញអំពីឆន្ទៈ និងបំណងដ៏ល្អ ក្នុងការជ្រោងជ្រែង ដល់ការកសាងធនធានមនុស្សលើវិស័យ នគរបាលនៅកម្ពុជា។
សូមបញ្ជាក់ថា សមិទ្ធផលសំខាន់ៗដែលត្រូវបានដាក់សម្ពោធ នាពេលនោះរួមមាន ផ្លូវបេតុងប្រវែង២.០៣០ម៉ែត្រ ប្រព័ន្ធលូបង្ហូរទឹកប្រវែង៥៥០ម៉ែត្រ គំនូសនិងផ្លាកសញ្ញា ចរាចរណ៍ ដែលជាអំណោយរបស់ លោកអ៊ុន ចាន់ដា អភិបាលខេត្តកំពង់ចាម, អគារស្នាក់នៅមួយខ្នង ទូដាក់ សម្ភារៈចំនួន១៦០ទូ គ្រែដេក២ជាន់ចំនួន៨០ ជាអំណោយរបស់លោក ជាម ច័ន្ទសោភ័ណ អភិបាលខេត្តត្បូងឃ្មុំ ,អគាស្នាក់នៅមួយខ្នង ទូរដាក់សម្ភារៈចំនួន១៦០ទូរ គ្រែដេកពីជាន់ ចំនួន ៨០ គ្រែជា អំណោយរបស់ លោក ម៉ែន វិបុល អភិបាលខេត្តស្វាយរៀង និងតារាងបាល់ទាត់ សួនច្បារ សួនរុក្ខជាតិ រុក្ខវិថី ឡដុតសំរាមព្រមទាំងសម្ភារៈគាំទ្រមួយចំនួនទៀត ដែលជាអំណោយរបស់សប្បុរសជននានា។ បន្ថែមលើសមិទ្ធផលដែលបានសម្ភោធដាក់ឱ្យប្រើប្រាស់នៅពេលនេះ លោក ជា សុមេធី អភិបាល ខេត្តព្រៃវែង បានសម្រេចជួយឧបត្ថម្ភអគារសិក្សាមួយន្លែង និងបំពាក់សម្ភារៈក្នុងតម្លៃទឹក ប្រាក់ជាង ២៣ម៉ឺនដុល្លារ ដល់សាលានគរបាលភូមិភាគ២បន្ថែមទៀត៕
