ដោយៈប្រសិទ្ធ
រូងភ្នំ Shuanghe ប្រវែងសរុប ២៥៧.៤ គីឡូម៉ែត្រ ស្ថិតនៅក្នុងរមណីយដ្ឋានទេសចរណ៍មួយឈ្មោះថា Twelve Back ក្នុងស្រុក Suiyang ខេត្ត Guizhou ភាគនិរតីនៃប្រទេសចិន កំពុងមានការចាប់អារម្មណ៍យ៉ាងខ្លាំងពីបណ្តាអ្នកទេសចរក្នុងស្រុក។ ដោយនៅក្នុងថ្ងៃឈប់សម្រាកក្នុងខែឧសភា រមណីយដ្ឋាននេះបានប្រារព្ធពិធីបុណ្យតន្ត្រី រយៈពេលប្រាំមួយថ្ងៃដោយមានការប្រគុំតន្ត្រី ការសម្តែងរ៉ុកនិងរ៉ូល និងបទភ្លេងដែលទាក់ទាញអ្នកទស្សនាប្រមាណជាង៣៨,០០០ នាក់។នេះបើយោងតាមសារពត៌មាន ស៊ីនហួ កាលពីថ្ងៃទី ៧ ខែមិថុនា។
លោក Yi Chuanbo អ្នកគ្រប់គ្រងរមណីយដ្ឋានបានថ្លែងថា ក្រោយពីព្រឹត្តិការណ៍នេះបញ្ចប់ទៅ រមណីយដ្ឋានទទួលបានភ្ញៀវទេសចរកាន់តែច្រើន ដោយមានភ្ញៀវ ទេសចរចាប់ពី ១,២០០ ទៅ ១,៥០០ នាក់ជារៀងរាល់ថ្ងៃ។ លោក Yi បានបន្ថែមថា ភ្ញៀវទេសចរត្រូវបានអនុញ្ញាតិឲ្យចូលទស្សនារូងភ្នំ ដែលមានប្រវែង ៤.៨ គីឡូម៉ែត្រ ត្រូវចំណាយពេលប្រហែលពីរម៉ោង ដើម្បីដើរចូលទៅខាងក្នុង។
លោក Luo Jianjun ប្រធានការិយាល័យប្រចាំរមណីយដ្ឋានបានថ្លែងថា “កាលពីអតីតកាលអ្នកទេសចរគ្រាន់តែដើរលេង ក្នុងរយៈពេលតែមួយថ្ងៃប៉ុណ្ណោះ នៅមុនពេលពួកគេចាកចេញទៅវិញ តែឥឡូវនេះមនុស្សជាច្រើនចូលចិត្តស្នាក់នៅទីនេះខ្លាំងណាស់”។ លោក Luo បានបញ្ជាក់ថារមណីយដ្ឋាននេះបានរៀបចំព្រឹត្តិការណ៍ប្រគុំតន្ត្រី និងសូត្រកំណាព្យជាច្រើន។
លោក Jiang Wei គ្រូបង្វឹកផ្នែកទស្សនាតាមរូងភ្នំបាននិយាយថា ល្អាង Shuanghe មានបួនស្រទាប់ ល្អាងធំៗចំនួនប្រាំបី និងមានល្អាងជាង ២០០នៅខាងក្នុងរូងភ្នំ។ Jiang បាននិយាយថា “រចនាសម្ព័ន្ធរបស់រូងភ្នំបានទាក់ទាញ អ្នកទស្សនាតាមរូងភ្នំឲ្យមានភាពរីករាយ”។ លោកបន្ថែមថា ដោយសារតែមានកំណើនអ្នកទេសចរ គេបានបន្ថែមអ្នកនាំផ្លូវ និងអ្នកណែនាំពីទិដ្ឋភាពនានាក្នុងរូងភ្នំនេះ រហូតដល់ ៦០នាក់ ដូចជារូបគាត់មានគេត្រូវការជាចាំបាច់ ដើម្បីណែនាំអ្នកទស្សនាតាមរូងភ្នំ និងបង្វឹកអ្នកដែលស្វែងរកដំណើរផ្សងព្រេងតាមរូងភ្នំ៕ https://www.youtube.com/watch?v=WI1fuPyo2uo
