ភ្នំពេញ៖ស្ត្រីម្នាក់បានជិះម៉ូតូដឹកកូនតូច២នាក់ត្រូវរថយន្តធំបើកមកពីក្រោយកៀរ ម៉ូតូក៏បានដួលខ្ទាតកូនអាយុ៤ឆ្នាំចូលក្រោមកង់បណ្តាលឱ្យកិនស្លាប់ម្នាក់។ហេតុការណ៍នេះបានកើតឡើងនៅផ្លូវបេតុងក្នុងភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ កាលពីរសៀលថ្ងៃទី៧ ខែមិថុនា ឆ្នាំ២០២៣។
ស្ត្រីជាម្តាយឈ្មោះស្រេង ស្រីតូច អាយុ២៣ឆ្នាំ ស្នាក់នៅភូមិសង្កាត់ខាងលើ។ប្តីឈ្មោះ ចេក ពន្លក ធ្វើជាងពិតាន មានកូន៤នាក់ ចំណែកក្មេងរងគ្រោះឈ្មោះ ចេក ពន្លឺ អាយុ៤ឆ្នាំ ជាកូនទី៣។
នាងរងគ្រោះបានឱ្យដឹងថា មុនកើតហេតុ ប្តីបានទូរសព្ទឱ្យទៅយកលុយនៅកន្លែងធ្វើការ។នាងក៏ជិះម៉ូតូដឹកកូនតូច២នាក់ ម្នាក់អាយុជាង១ខួបនិងម្នាក់ទៀតអាយុ៤ឆ្នាំ ។កូនច្បងអង្គុយក្រោយឱបប្អូនតូចនៅកណ្តាល។មកដល់កន្លែងខាងលើ ស្រាប់តែមានរថយន្តស្ទូចបើកមកពីក្រោយកៀរម៉ូតូបណ្តាលឱ្យរអិលភក់ដួល ខ្ទាតកូនច្បងចូលក្រោមរថយន្តកិនស្លាប់តែម្តង ហើយរថយន្តបានបើករត់បាត់។ភ្លាមនោះសមត្ថកិច្ចចុះអន្តរាគមន៍ជួយឆែកកាមេរ៉ាដើម្បីស្រាវជ្រាវតាមចាប់រថយន្តបង្កយកមកដោះស្រាយតាមច្បាប់៕
