ដោយ៖វិចិត្រ
ភ្នំពេញ៖កម្លាំងនាយកដ្ឋានប្រឆាំងការជួញដូរមនុស្សនិងការពារអនីតិជន ជាមួយអាជ្ញាធរខណ្ឌ បានចុះបង្ក្រាបទីតាំងម៉ាស្សាបង្កប់សេវាបម្រើផ្លូវភេទ ដោយឃាត់ខ្លួនស្ត្រី៥នាក់និងមេការម្នាក់។ករណីនេះធ្វើឡើងនៅទីតាំងម៉ាស្សាយីហោ “ម៉ាក់ស្រីកា” ម្តុំបុរីញ៉ូថោន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ កាលពីម៉ោង១១យប់ ថ្ងៃទី៦ ខែមិថុនា។
មន្ត្រីក្នុងប្រតិបត្តិការបានឱ្យដឹងថា ការបង្ក្រាបទីតាំងម៉ាស្សាបង្កប់សេវាបម្រើផ្លូវភេទនេះ សមត្ថកិច្ចបានឃាត់ខ្លួនស្រី្ដបម្រើសេវាកម្សាន្តផ្លូវភេទចំនួន៥នាក់ ជាអនីតិជន២នាក់ មានទាំងមេការម្នាក់ផង ហើយត្រូវបញ្ជូនទៅឱ្យផ្នែកជំនាញ។ ចំណែកវត្ថុតាងដែលត្រូវដកហូតមាន៖ ម៉ូតូមួយគ្រឿងម៉ាកធូដេ ផ្លាកលេខភ្នំពេញ1KE-4685 និងទូរសព្ទជាច្រើនគ្រឿង។
ពេលឆែកឆេររកឃើញស្រោមអនាម័យដែលប្រើរួចជាច្រើនវេចខ្ចប់ក្នុងថង់ត្រូវបានប្រមូលទុកជាភស្តុតាងដើម្បីកសាងសំណុំរឿង។ក្រោយមកស្ត្រីទាំង៥នាក់និងមេការម្នាក់ត្រូវបញ្ជូន បន្តតាមនីតិវិធី។ចំណែកទីតាំងផ្ទះម៉ាស្សាត្រូវចាក់សោបិទជាបណ្ដោះអាសន្ន៕
