ដោយ៖តុលា
ក្រុមហ៊ុនអវកាស SpaceX បានបញ្ជូនអវកាសយានិកជនជាតិអារ៉ាប៊ីសាអូឌីតស្រីម្នាក់ និងប្រុសម្នាក់ជាលើកដំបូងទៅកាន់ស្ថានីយអវកាសអន្តរជាតិ តាមជើងហោះហើរតម្លៃរាប់លានដុល្លារកាលពីថ្ងៃអាទិត្យ។
ក្រុមហ៊ុន SpaceX បានបើកដំណើរការសេវាកម្មហោះហើរទៅកាន់ទីអវកាសកាលពីថ្ងៃអាទិត្យ ដែលដឹកនាំដោយអវកាសយានិកណាសាចូលនិវត្តន៍អាម៉េរិក លើរ៉ុក្កែត SpaceX Falcon 9 បាញ់ចេញពីមជ្ឈមណ្ឌលអវកាស Kennedy នៅ Cape Canaveral ភាគខាងត្បូងសហរដ្ឋអាម៉េរិកនៅម៉ោង ៥ និង៣៧នាទីល្ងាចម៉ោងក្នុងស្រុកថ្ងៃអាទិត្យទី ២១ ខែឧសភា ឆ្នាំ២០២៣។
អ្នកធ្វើដំណើររួមមានជនជាតិអារ៉ាប៊ីសាអូឌីត ស្រ្តីនេះមានឈ្មោះថា Rayyanah Barnawi ជាអ្នកស្រាវជ្រាវជំងឺមហារីកសុដន់ មកពីប្រទេសអារ៉ាប៊ីសាអូឌីត ខណៈបុរសអារ៉ាប៊ីសាអូឌីតម្នាក់ទៀតគឺ Ali al-Qarni ដែលជាអ្នកបើកបរយន្តហោះចម្បាំងរបស់ជាតិ។
ពួកគេទាំងពីរ ត្រូវបានដឹកនាំដោយអវកាសយានិកចូលនិវត្តន៍អាម៉េរិក Peggy Whitson និងអ្នកជំនួញអាម៉េរិក John Shoffner។ ពួកគេគ្រោងនឹងធ្វើដំណើរទៅដល់កន្សោមស្ថានីយអវកាសអន្តរជាតិនៅប្រហែលជាព្រឹកថ្ងៃចន្ទនេះ និងត្រូវចំណាយពេលជាងមួយសប្តាហ៍នៃបេសកកម្មនៅទីនោះមុនពេលត្រលប់មកផែនដីវិញចុះតាមឆ្នេរសមុទ្រនៃរដ្ឋ Florida ភាគខាងត្បូងសហរដ្ឋអាម៉េរិក។
វាក៏ជាលើកដំបូងហើយនៃជនជាតិអារ៉ាប៊ីសាអូឌីតដែលបានជិះរ៉ុក្កែត ចាប់តាំងពីព្រះអង្គម្ចាស់អារ៉ាប៊ីសាអូឌីតបានបើកយាន Discovery ក្នុងឆ្នាំ ១៩៨៥។ វាជាការហោះហើរឯកជនទីពីរហើយទៅកាន់ស្ថានីយអវកាសដែលរៀបចំដោយ Axiom Space ដែលមានមូលដ្ឋាននៅទីក្រុងហ៊ូស្តុន។ តាមប្រភព Axiom Space ដំណើរនេះ អវកាសយានិកក្នុងម្នាក់ត្រូវចំណាយប្រាក់ប្រមាណ ៥៥លានដុល្លារអាម៉េរិក៕
ប្រភព៖ REUTERS
