ដោយ៖វិចិត្រ
ស្វាយរៀង៖ក្រុមអន្តរាគមន៍បង្ក្រាបបទល្មើសចលនាសត្វនាយកដ្ឋានសុខភាពសត្វ បានចាប់ រថយន្តដឹកមាន់និង សត្វព្រាបអត់ច្បាប់ ដោយនាំចូលពីវៀតណាមមកកម្ពុជា។
មន្ត្រីក្នុងប្រតិបតិ្តការបានឱ្យដឹងថា ឈ្មួញលួចនាំមាន់រស់និងសត្វព្រាបរាប់ពាន់ក្បាលពីប្រទេសវៀតណាមចូលមកតាមច្រករបៀងក្រសាំងជ្រំ ស្រុកស្វាយជ្រំ ឆ្ពោះទៅរាជធានីភ្នំពេញ។រថយន្តដឹកទំនិញអត់ច្បាប់នេះត្រូវក្រុមជំនាញស្ទាក់ចាប់បាន។
ករណីនេះបានធ្វើឡើងនៅលើផ្លូវជាតិលេខ១ ត្រង់ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ កាលពីថ្ងៃទី១៧ ឧសភា។
លោកហ៊ុន សារ៉ាត់ ក្រុមការងារអន្តរាគមន៍បង្ក្រាបបទល្មើសចលនាសត្វអគ្គនាយកដ្ឋានសុខភាពសត្វនៃក្រសួងកសិកម្ម បានឱ្យដឹងថា រថយន្តដែលឃាត់នេះម៉ាកហ៊ីយិនដាយ ផ្លាកលេខកំពត3A-0086។ក្នុងនោះមានមាន់សំឡីរស់ចំនួន១.៤០០ក្បាលនិងសត្វព្រាបរស់ចំនួន១០០ក្បាល។
ទំនិញអត់ច្បាប់នេះនាំចូលតាមច្រករបៀងក្រសាំងជ្រំ ឃុំក្រួស ស្រុកស្វាយជ្រំ ខេត្តស្វាយរៀង ឆ្ពោះទៅភ្នំពេញ។ក្រោយមកក្រុមការងារបាននាំយកបទល្មើស និងវត្ថុតាងទាំងនោះទៅទុកនៅកន្លែងធ្វើចត្តាឡីស័ក្ដសត្វនៃអគ្គនាយកដ្ឋានសុខភាពសត្វ និងផលិតកម្មសត្វដើម្បីចាត់ការបន្ត៕