ដោយ៖វិចិត្រ
ភ្នំពេញ៖សមត្ថកិច្ចកំពុងតាមរកចាប់តៃកុងរថយន្តដឹកស៊ីម៉ងត៍ យកមកចាត់ការតាមច្បាប់ ករណីបើកវ៉ាជែងជ្រុលបុកម៉ូតូ រួចកិនបុរសម្នាក់ឱ្យបែកក្បាលធ្លាយខួរស្លាប់មួយរំពេច។ហេតុការណ៍ដ៏រន្ធត់នេះបានកើតឡើងនៅតាមមហាវិថីឈ្នះឈ្នះ ស្ថិតក្នុងសង្កាត់គោករកា ខណ្ឌព្រែកព្នៅ កាលពីម៉ោងជា១១យប់ថ្ងៃទី១៦ ខែឧសភា។
ជនរងគ្រោះបាត់បង់ជីវិតឈ្មោះគង់ សារ៉ាយ អាយុ៤០ឆ្នាំ អ្នកលក់បង្អែមគ្រប់មុខ ស្នាក់នៅភូមិកណ្ដាល សង្កាត់ព្រែកព្នៅ ខណ្ឌព្រែកព្នៅ។
សាក្សីបានឱ្យដឹងថា មុនកើតហេតុគេឃើញជនរងគ្រោះជិះម៉ូតូម៉ាកហុងដា PCX ផ្លាកលេខភ្នំពេញ1GD-5974 តាមមហាវិថីឈ្នះឈ្នះពីត្បូងទៅជើង។មកដល់កន្លែងខាងលើ ស្រាប់តែមានរថយន្តធុនធំដឹកស៊ីម៉ងត៍បើកវ៉ាជែងជាមួយរថយន្តដឹកថ្ម ក៏ជ្រុលទៅបុកម៉ូតូរួចកិនមនុស្សឱ្យបែកក្បាលធ្លាយខួរស្លាប់ភ្លាមតែម្តង។ ចំណែករថយន្តបង្កបានបើករត់គេចបាត់៕
