ដោយ៖តុលា
ក្រុមហ៊ុន Apple កាលពីថ្ងៃអង្គារបានប្រកាសស៊េរីឧបករណ៍ងាយស្រួលប្រើប្រាស់ថ្មីសម្រាប់ iPhone និង iPad រួមទាំងមុខងារដែលអាចនឹងចម្លងសំឡេងរបស់អ្នកប្រើសម្រាប់ការហៅទូរសព្ទបន្ទាប់ពីការវាស់ស្ទង់ចាប់សំឡេងត្រឹមតែ ១៥ នាទី។
តាមការចេញផ្សាយដោយស៊ីអិនអិនដកស្រង់ការប្រកាសដោយក្រុមហ៊ុន មុខងារនេះត្រូវបានគេហៅថា Personal Voice វាអាចនឹងត្រូវបានគេចេញនៅចុងឆ្នាំនេះ។ អ្នកប្រើប្រាស់អាចប្រើវាដោយគ្រាន់តែអានសារជាអក្សរធម្មតាដូចជាការថតសំឡេង ខណៈដែលមុខងារនៃបច្ចេកវិទ្យារៀនសំឡេងនឹងដំណើរការដោយខ្លួនឯងស្វ័យប្រវត្តិ។ មុខងារពាក់ព័ន្ធដែលហៅថា Live Speech ក្រោយ ១៥នាទី វានឹងចេះរៀនសំយោគស្វ័យប្រវត្តិនូវសំឡេងអ្នកប្រើប្រាស់ ធ្វើឲ្យដូចសំឡេងអ្នកប្រើម្ចាស់ទូរសព្ទ ហើយនឹងបញ្ជូនសំឡេងនោះទៅកាន់ដៃគូ ក្នុងអំឡុងពេលការហៅទូរសព្ទ ការសន្ទនាតាម FaceTime និងការសន្ទនាដោយផ្ទាល់។
មនុស្សក៏នឹងអាចរក្សាទុកឃ្លាពិសេសៗ សំខាន់ៗដែលប្រើជាទូទៅដើម្បីប្រើក្នុងពេលសន្ទនាផ្ទាល់ផងដែរ។ មុខងារនេះគឺជាផ្នែកមួយនៃគោលបំណងធ្វើឱ្យឧបករណ៍របស់ Apple រួមបញ្ចូលកាន់តែច្រើនសម្រាប់អ្នកដែលមានពិការភាពការយល់ដឹង ការមើលឃើញ ការស្តាប់ និងការចល័ត។ Apple បាននិយាយថា មនុស្សដែលអាចមានលក្ខខណ្ឌដែលពួកគេបាត់បង់សំឡេងតាមពេលវេលាណាមួយ ដូចជាស្អក មានជំងឺបញ្ហាប្រព័ន្ធសំឡេង ដូចជា ALS (amyotrophic lateral sclerosis) អាចទទួលបានអត្ថប្រយោជន៍ច្រើនបំផុតពីឧបករណ៍នេះ។ ក្រុមហ៊ុន Apple បាននិយាយថា មុខងារនេះនឹងចេញនៅចុងឆ្នាំនេះ។
Sarah Herrlinger នាយកជាន់ខ្ពស់របស់ Apple នៃ Global Accessibility Policy and Initiatives បាននិយាយនៅក្នុងប្លុករបស់ក្រុមហ៊ុនថា “ភាពងាយស្រួលគឺជាផ្នែកមួយនៃអ្វីគ្រប់យ៉ាងដែលយើងធ្វើនៅ Apple” ។ “លក្ខណៈពិសេសប្លែកទាំងនេះត្រូវបានរចនាឡើងដោយមានមតិកែលម្អពីសមាជិកនៃសហគមន៍ពិការគ្រប់ជំហាននៃមធ្យោបាយ ដើម្បីគាំទ្រដល់ក្រុមអ្នកប្រើប្រាស់ចម្រុះ និងជួយមនុស្សឱ្យភ្ជាប់ទំនាក់ទំនងតាមរបៀបថ្មី”៕
ប្រភព៖ REUTERS
