អ៊ុយក្រែនប្រាប់ប្រជាជនកុំឲ្យទទួលលិខិតឆ្លងដែនរុស្ស៊ីឲ្យសោះ ដោយអំពាវនាវឲ្យនាំគ្នារត់ចេញតាមដែលអាចធ្វើទៅបាន ឬមួយក៏រង់ចាំកងកម្លាំងអ៊ុយក្រែនទៅរំដោះនាពេលឆាប់ៗនេះ។
![](https://cambodiaflashnews.com/wp-content/uploads/2021/06/top-banner.gif)
លោកស្រី Iryna Vereshchuk ឧបនាយករដ្ឋមន្ត្រី និងជារដ្ឋមន្ត្រីក្រសួងធ្វើសមាហរណកម្មនៃដែនដីកាន់កាប់បណ្តោះអាសន្នអ៊ុយក្រែនបានអំពាវនាវដល់ប្រជាពលរដ្ឋ នៃដែនដីដែលរុស្ស៊ីកាន់កាប់បណ្តោះអាសន្ន កុំទទួលយកលិខិតឆ្លងដែនរុស្ស៊ី និងកុំសហការជាមួយពួកឈ្លានពានតាមគ្រប់មធ្យោបាយ។ Vereshchukថា អ្នកកាន់កាប់ចង់ឱ្យអ៊ុយក្រែនក្លាយជាជនជាតិរុស្ស៊ី ឬចាកចេញពីទឹកដីដែលកាន់កាប់បណ្តោះអាសន្ននោះ។ ប៉ុន្តែយ៉ាងណាក៏ដោយ លោកស្រីជឿជាក់ថា វាមិនអាចប្រែក្លាយជនជាតិអ៊ុយក្រែនទៅជាជនជាតិរុស្ស៊ីបានឡើយ ទោះបីត្រូវបង្ខំចិត្តធ្វើលិខិតឆ្លងដែនក៏ដោយ ហើយអ្នកកាន់កាប់នឹងមិនស្នាក់នៅក្នុងប្រទេសអ៊ុយក្រែនយូរដែរ។
សម្រង់សម្ដីពី Vereshchuk៖ “អនុសាសន៍របស់ខ្ញុំចំពោះជនជាតិអ៊ុយក្រែននៅក្នុងទឹកដីដែលកាន់កាប់បណ្តោះអាសន្ននៅតែដដែល៖ ចូរកុំទទួលយកលិខិតឆ្លងដែនរុស្ស៊ី; កុំសហការជាមួយអ្នកឈ្លានពាន; ចាកចេញប្រសិនបើអាចធ្វើទៅបាន; ចុងក្រោយគឺរង់ចាំកងកម្លាំងប្រដាប់អាវុធអ៊ុយក្រែនយើងទៅរំដោះ”។
គួររំលឹកថា ប្រតិបត្តិការរំដោះអ៊ុយក្រែនបានប្រកាសឡើងអស់រយៈពេលយូរមកហើយ តែមិនដឹងកាលបរិច្ឆេទចាប់ផ្តើមច្បាស់លាស់ឡើយ។ ទាហានស៊ីឈ្នួលរុស្ស៊ីថា អ៊ុយក្រែនកំពុងរង់ចាំឱកាសល្អ រង់ចាំភូមិសាស្រ្តអំណោយផល និងប្រមូលអាវុធបានគ្រប់គ្រាន់៕
ប្រភព៖ Ukrainska Pravda
ប្រភពរូប៖Ukrainska Pravda
ប្រែសម្រួល៖សុខ តុលា