បាត់ដំបង៖មកដល់ថ្ងៃទី២ ខែឧសភានេះ សមត្ថកិច្ចមិនទាន់ចាប់បានក្រុមភាគីបង្កឱ្យមនុស្សម្នាក់ស្លាប់ពេលបញ្ជូនទៅសង្រ្គោះនៅមន្ទីរពេទ្យនោះនៅឡើយ។ហេតុការណ៍ខាងលើនេះ បានកើតឡើងនៅម្តុំស្ដុបច្រមុះជ្រូក ស្ថិតក្នុងភូមិរំចេក៤ សង្កាត់រតនៈ ក្រុង/ខេត្តបាត់ដំបង កាលពីរំលងអធ្រាត្រឈានចូលថ្ងៃទី១ ខែឧសភា។
លោកពេជ្រ សារ៉ែន អធិការនគរបាលក្រុងបាត់ដំបង បានឱ្យដឹងថា ជនរងគ្រោះដែលស្លាប់ឈ្មោះ ទិត្យ សំណាង អាយុ១៨ឆ្នាំ នៅភូមិអូរដំបង២ ឃុំអូរដំបង ស្រុកសង្កែ ខេត្តបាត់ដំបង។
មុនកើតហេតុ ខាងជនរងគ្រោះមានគ្នា៩នាក់ជិះម៉ូតូ៥គ្រឿង។ រីឯភាគីម្ខាងទៀតមានគ្នាតែ២នាក់ជិះម៉ូតូមួយគ្រឿង។អំពើហិង្សាគឺផ្ដើមចេញពីការជិះម៉ូតូមើលមុខគ្នា រួចបោះសម្ដីឌឺដងគ្នា ទើបប្រើដុំឥដ្ឋគប់គ្នាទៅវិញទៅមកឈានដល់មានស្លាប់និងរបួសតែម្តង។
បុរសដែលស្លាប់គឺត្រូវភាគីម្ខាងគប់នឹងដុំថ្មចំកញ្ចឹងកខាងក្រោយពេលកំពុងជិះម៉ូតូរងរបួសធ្ងន់ហើយបានស្លាប់ពេលដឹកទៅមន្ទីរពេទ្យ។ក្រោយមកកម្លាំងជំនាញកំពុងសាកសួរសាក្សីដើម្បីស្រាវជ្រាវរកមុខសញ្ញាភាគីម្ខាងទៀតដើម្បីយកមកចាត់ការតាមនីតិវិធី៕ដោយ៖វិចិត្រ