រុស្ស៊ីអះអាងថា បានបាញ់ទម្លាក់យន្តហោះគ្មានមនុស្សបើកអ៊ុយក្រែនមួយគ្រឿងនៅភាគខាងលិចនៃតំបន់គ្រីមៀរកាលពីថ្ងៃចន្ទដើមសប្តាហ៍នេះ។
លោក Sergey Aksyonov អភិបាលនៃសាធារណរដ្ឋប្រជាមានិតគ្រីមៀរ បានសរសេរនៅលើបណ្តាញ Telegram របស់គាត់កាលពីថ្ងៃចន្ទថា “យន្តហោះគ្មានមនុស្សបើកមួយ ត្រូវបានបាញ់ទម្លាក់ដោយកងកម្លាំងការពារដែនអាកាសរុស្ស៊ីនៅភាគខាងលិចនៃតំបន់គ្រីមៀរ”។ លោកថា “UAV នោះគឺជារបស់អ៊ុយក្រែន ត្រូវបានបាញ់ទម្លាក់ដោយកងកម្លាំងការពារដែនអាកាសនៅភាគខាងលិចនៃតំបន់គ្រីមៀរ។ បុគ្គលិករបស់យើងដោះស្រាយភារកិច្ចបានច្បាស់លាស់ និងមានប្រសិទ្ធភាព។ ខ្ញុំសុំឲ្យអ្នករាល់គ្នារក្សាភាពស្ងប់ស្ងាត់ និងជឿទុកចិត្តតែប្រភពព័ត៌មានដែលគួរឲ្យទុកចិត្តរបស់យើងប៉ុណ្ណោះ”។ ជុំវិញព័ត៌មានលម្អិត មិនមានអ្នកស្លាប់ របួស និងការខូចខាតណាត្រូវបានរាយការណ៍ឡើយ។
លោក Aksyonov ធ្លាប់បាននិយាយនៅក្នុងបទសម្ភាសន៍ជាមួយប្រភព TASS កាលពីខែធ្នូថា “យន្តហោះគ្មានមនុស្សបើករបស់អ៊ុយក្រែននៅតែជាប្រភពនៃការគំរាមកំហែងដល់តំបន់”៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
