ភ្នំពេញ៖បុរសម្នាក់បានបូមទឹកបឹងឈូកមួយដើម្បីចាប់ត្រី ពេលរីងទឹកចុះរាវចាប់ត្រីស្រាប់តែ ឃើញគ្រោងឆ្អឹងមនុស្សមិនដឹងស្លាប់ពីពេលណា ត្រូវសមត្ថកិច្ចកំពុងស្វែងរកអត្តសញ្ញាណ។ហេតុការណ៍បង្កការភ្ញាក់ផ្អើលនេះនៅបឹងឈូកមួយ ជិតវត្តគល់ទទឹង ស្ថិតក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ កាលពីថ្ងៃទី៣០ ខែមេសា។
សពខាងលើមិនទាន់ស្គាល់អត្តសញ្ញាណនៅឡើយទេ។ បុរសឈ្មោះ រស់ ចាន់វណ្ណេត នៅភូមិសង្កាត់ខាងលើបានឱ្យដឹងថា មុនកើតហេតុ រូបគាត់បានដាក់ម៉ាស៊ីនបូមទឹកដើម្បីចាប់ត្រី។ពេលបូមរីងក៏ចុះចាប់ត្រីស្រាប់តែប្រទះឃើញគ្រោងឆ្អឹងមនុស្សម្នាក់នៅក្នុងរណ្តៅនោះតែម្តង។រូបគាត់បានរត់ទាំងព្រលឹងចុងសក់ទៅប្រាប់សមត្ថកិច្ច។
នៅជិតកន្លែងកើតហេតុ សមត្ថកិច្ចរកឃើញខោខ្លី ពណ៌ក្រហម មានគ្រោងឆ្អឹងជើងមួយចំនួន និងរកឃើញអាវយឺតដៃវែង ពណ៌ក្រហមលាយខ្មៅ មានគ្រោងឆ្អឹងជំនីរ និងគ្រោងឆ្អឹងដៃហើយនៅក្នុងទឹកឃើញលលាដ៍ក្បាល។
តាមការពិនិត្យពីផ្នែកជំនាញមិនអាចបញ្ជាក់ពីមូលហេតុបានទេ ព្រោះសល់តែគ្រោងឆ្អឹងបែបនេះ ហើយក៏បានប្រគល់ឱ្យសមត្ថកិច្ចមូលដ្ឋានដើម្បីបន្តស្វែងរកអត្តសញ្ញាណតាមជំនាញ៕ដោយ៖វិចិត្រ
