រុស្ស៊ីបើកការវាយប្រហារទូទាំងប្រទេសអ៊ុយក្រែន រួមទាំងរដ្ឋធានីគៀវនៅចុងសប្តាហ៍នេះ ដោយបានសម្លាប់មនុស្សសរុបរហូតទៅដល់២៥នាក់។
![](https://cambodiaflashnews.com/wp-content/uploads/2021/06/top-banner.gif)
ការវាយប្រហារដោយមីស៊ីលរបស់រុស្ស៊ីចុងក្រោយថ្ងៃសុក្រទី ២៨ ខែមេសា ឆ្នាំ២០២៣ នៅប្រទេសអ៊ុយក្រែន ត្រូវបានក្រសួងមហាផ្ទៃអ៊ុយក្រែនធ្វើបច្ចុប្បន្នភាពចុងក្រោយថាបានសម្លាប់មនុស្ស២៥នាក់ ដែលរួមមានទាំងកុមារអាយុ១០ឆ្នាំពីរនាក់ និងក្មេងតូចម្នាក់ផងដែរ។ ក្នុងចំណោមមីស៊ីល២៣គ្រាប់ អ៊ុយក្រែនបានស្ទាក់ចាប់បាន២១គ្រាប់ និងបានបាញ់ទម្លាក់យន្តហោះគ្មានមនុស្សបើកចំនួន២គ្រឿងរបស់រុស្ស៊ីកាលពីព្រឹកថ្ងៃសុក្រ។
ការវាយប្រហារនេះបានធ្វើឡើងមកលើអគារលំនៅដ្ឋានកម្ពស់ប្រាំបួនជាន់ នៅកណ្តាលក្រុង Uman អ៊ុយក្រែន ដែលជាទីក្រុងមួយស្ថិតនៅចម្ងាយប្រហែល ២១៥ គីឡូម៉ែត្រភាគខាងត្បូងនៃទីក្រុង Kyiv។ ជុំវិញការវាយប្រហារនេះ មិនខុសនឹងសព្វដង រុស្ស៊ីមិនបានចេញមុខទទួលខុសត្រូវឡើយ។ ក្រសួងការពារជាតិរុស្ស៊ីនិយាយថា កងកម្លាំងរបស់ខ្លួនបានបើកការវាយប្រហាររយៈចម្ងាយឆ្ងាយ និងមានភាពជាក់លាក់ខ្ពស់ពេញមួយយប់ទៅលើអង្គភាពបម្រុងរបស់កងទ័ពអ៊ុយក្រែន ហើយថាគោលដៅដែលបានកំណត់ទាំងអស់ត្រូវបានវាយប្រហារ៕
ប្រភព៖ ALJAZEERA
ប្រភពរូប៖ ALJAZEERA
ប្រែសម្រួល៖សុខ តុលា