ភ្នំពេញ៖ បុរស២នាក់ជិះម៉ូតូឌុបគ្នាឆ្លងកាត់បារ៉ាស់ដែក ស្រាប់តែដាច់ច្រវាក់ធ្លាក់សង្កត់បណ្តាលឱ្យរងរបួសធ្ងន់ទាំង២នាក់ ត្រូវគេជួយដឹកទៅមន្ទីរពេទ្យភ្លាមៗ។ហេតុការណ៍នេះបានកើតឡើងស្ថិតនៅមុខឃ្លាំងស្តុកទំនិញមួយ ក្នុងភូមិសំបួរ សង្កាត់ដង្កោ ខណ្ឌដង្កោ កាលពីរសៀលថ្ងៃទី២៨ មេសា។
![](https://cambodiaflashnews.com/wp-content/uploads/2021/06/top-banner.gif)
មន្រ្តីមូលដ្ឋានបានឱ្យដឹងថា ជនរងគ្រោះទាំង២នាក់រងរបួសធ្ងន់ឈ្មោះនាង ស៊ីន អាយុ៣៥ឆ្នាំ ជាបុគ្គលិកក្រុមហ៊ុន នៅស្រុកកៀនស្វាយ ខេត្តកណ្តាល។ឈ្មោះឈរ ភក្តី អាយុ៣៤ឆ្នាំ នៅសង្កាត់បឹងទំពន់២ ខណ្ឌមានជ័យ។
ករណីនេះបង្កពីម្ចាស់ឃ្លាំងស្តុកទំនិញបានដាក់បារ៉ាស់ដែកកាត់ទទឹងផ្លូវដើម្បីមិនឱ្យរថយន្តធំផ្សេងបើកឆ្លងកាត់។លុះរថយន្តរបស់ខ្លួនចូល សន្តិសុខក៏បើកបារ៉ាស់ឱ្យកុងតឺន័រក្រុមហ៊ុនចូលដាក់ទំនិញក្នុងឃ្លាំង។ពេលនោះបារ៉ាស់បានដាច់ច្រវាក់សម្រាប់ទាញបិទ-បើកបណ្ដាលឱ្យធ្លាក់សង្កត់លើបុរស២នាក់កំពុងជិះម៉ូតូឆ្លងកាត់ឱ្យរងរបួសធ្ងន់តែម្តង។ក្រោយកើតហេតុ កម្លាំងនគរបាលបានចុះទៅពិនិត្យទីតាំងនោះនិងបន្តនីតិវិធី៕ដោយ៖វិចិត្រ