ដោយ៖ សហការី
វេជ្ជបណ្ឌិតនៅអាម៉េរិក និងអង់គ្លេសបានព្រមានថា ការរួមភេទតាមមាត់បង្កឲ្យមានគ្រោះថ្នាក់ និងមានរោគមហារីកបំពង់ក។
លោក វេជ្ជបណ្ឌិត Hisham Mehanna មកពីសាកលវិទ្យាល័យ Birmingham របស់ចក្រភពអង់គ្លេសបាននិយាយថា មនុស្សចំនួន ៧០ភាគរយ ក្នុងករណីជំងឺមហារីកបំពង់ក គឺបណ្តាលមកពីវីរុស papillomavirus របស់មនុស្ស (HPV) ដែលជាមេរោគធម្មតាមិនបង្កគ្រោះថ្នាក់ តែវាឆ្លងតាមការរួមភេទ ដែលអាចបង្កឲ្យមានជំងឺមហារីកជាច្រើនប្រភេទ។
លោក វេជ្ជបណ្ឌិត Mehanna បាននិយាយទៀតថា អ្នកដែលមានដៃគូរួមភេទតាមមាត់ច្រើននាក់ អាចមានហានិភ័យកម្រិតខ្ពស់ដល់ទៅប្រាំបួនដង ដែលអាចបង្កឲ្យមានជំងឺមហារីកបំពង់ក។ លោកវេជ្ជបណ្ឌិតបានសរសេរនៅលើ The Conversation ថា “នៅក្នុងរយៈពេលជាងពីរទសវត្សរ៍កន្លងមក មានសន្ទុះកើនឡើងយ៉ាងឆាប់រហ័សនូវជំងឺមហារីកបំពង់កនៅតំបន់ខាងលិច ក្នុងកម្រិតមួយដែលគេហៅថា ជាជំងឺរាតត្បាត។
ជំងឺមហារីកបំពង់ក ត្រូវបានអ្នកជំនាញហៅថា អូរ៉ូហ្វារីអ៊ីនជែល ខេនស័រ (oropharyngeal cancer”)។ វាគឺជាប្រភេទមហារីកបំពង់កទូទៅ ដែលកកើតនៅក្នុង ថុនស៊ែលស៍ (tonsils) និងផ្នែកខាងក្រោយបំពង់ក។ លោក វេជ្ជបណ្ឌិតបានចាត់ទុកការឆ្លងមេរោគ HPV ជាហានិភ័យដែលធ្វើឲ្យជំងឺមានការវិវត្តទៅជាធ្ងន់ធ្ងរ។
អ្នកដែលមានដៃគូរួមភេទតាមមាត់ប្រាំមួយនាក់ ឬច្រើនជាងនេះ គឺមានសក្តានុពលវិវត្តន៍ទៅជាមហារីកបំពង់ក ៨,៥ ដង ជាងអ្នកដែលមិនរួមភេទតាមមាត់។ មានករណីច្រើនជាង ៥០,០០០ ករណីនៃជំងឺមហារីក ឬ អូរ៉ូហ្វារីអ៊ីនជែល (oropharyngeal) ត្រូវបានគេធ្វើរោគវិនិច្ឆ័យឃើញនៅក្នុងសហរដ្ឋអាម៉េរិកជារៀងរាល់ឆ្នាំ ដែលបណ្តាលឲ្យមានអ្នកស្លាប់ច្រើនជាង ១០,០០០ នាក់ក្នុងមួយឆ្នាំៗ។ គួរបញ្ជាក់ថា បើយោងតាមទិន្នន័យរបស់សមាគមជំងឺមហារីកអាមេរិក ចំនួនករណីខាងលើកំពុងកើនឡើងរហូតដល់ ១.៣ ភាគរយចំពោះស្ត្រី និង ២.៨ ភាគរយចំពោះបុរស ដែលកើតមានក្នុងមួយឆ្នាំៗ៕
