ភ្នំពេញ៖ក្មេងស្រី៤នាក់ជាបងប្អូនជីដូនមួយ នាំគ្នាចុះរាវលៀសក្នុងអូរបណ្តាលឱ្យលង់ទឹកស្លាប់២នាក់ ត្រូវបានជួយសង្គ្រោះទាន់ចំនួន២នាក់។ហេតុការណ៍ដ៏សោកសង្រេងនេះ បង្កឲ្យមានការភ្ញាក់ផ្អើលនៅម្តុំអូរបាក់អង្រុត ក្នុងភូមិសាក់ប្រយុទ្ធ សង្កាត់ស្នោ ខណ្ឌកំបូល កាលពីរសៀលថ្ងៃទី២៦ មេសា។
មន្ត្រីនគរបាលប៉ុស្តិ៍បានឱ្យដឹងថា ក្មេងស្រីរងគ្រោះបាត់បង់ជីវិត ឈ្មោះដា វណ្ណា អាយុ១៣ឆ្នាំនិងឈ្មោះ អឿន ស្រីឡាន អាយុ១៤ឆ្នាំ។ពួកគេជាសិស្សនិងត្រូវជាបងប្អូនជីដូនមួយនៅភូមិត្រពាំងអារ័ក្ស សង្កាត់ឳឡោក ខណ្ឌកំបូល រាជធានីភ្នំពេញ ។
ប្រភពដដែលបានបន្តថា មុនកើតហេតុក្មេងស្រីចំនួន៤នាក់ ដែលត្រូវជាបងប្អូនជីដូនមួយ បាននាំគ្នាទៅរាវលៀសជាមួយយាយរបស់ខ្លួននៅអូរបាក់អង្រុត។ក្រោយមកលោកយាយក៏បានឡើងទៅផ្ទះមុន ចៅ៤នាក់នៅលេងទឹកហើយរាវលៀសបន្ត។ពេលនោះក្មេងស្រីម្នាក់បានធ្លាក់ជម្រាលជ្រៅក៏បានលង់ទឹក ហើយក្មេងស្រី៣នាក់ទៀតឃើញបាននាំគ្នាទៅជួយចាប់ទាញ ស្រាប់តែលង់ទឹកទាំងអស់គ្នា។ភ្លាមៗនោះប្រជាពលរដ្ឋបានឃើញក៏ទៅជួយសង្គ្រោះបាន២នាក់។
ចំណែកក្មេងស្រី២នាក់ទៀតបានលិចទឹកអូរនោះបាត់ខ្លួនតែម្តង។បន្ទាប់ពីនោះអ្នកភូមិបាននាំគ្នាជួយរាវរកឃើញក្មេងស្រី២នាក់ តែពួកនាងបានស្លាប់បាត់ទៅហើយ៕ដោយ៖វិចិត្រ
