រុស្ស៊ីនិយាយថា សង្រ្គាមនុយក្លេអ៊ែរកំពុងខិតចូលមកដល់ហើយ ព្រោះដោយសារតែ ទង្វើគាំទ្ររបស់សហរដ្ឋអាម៉េរិកទៅលើអ៊ុយក្រែនហាក់កើនឡើងខ្លាំងជ្រុលហួសហេតុ។
![](https://cambodiaflashnews.com/wp-content/uploads/2021/06/top-banner.gif)
ការព្រមាននេះ ធ្វើឡើងដោយលោក Vladimir Yermakov ដែលជាប្រធានផ្នែកការមិនរីកសាយភាយនុយក្លេអ៊ែររបស់ក្រសួងការបរទេសរុស្ស៊ី បានប្រាប់ទីភ្នាក់ងារព័ត៌មាន TASS នាពេលថ្មីៗនេះ។ Yermakov ប្រាប់ថា “ទីក្រុងវ៉ាស៊ីនតោនកំពុងបង្កើនហានិភ័យចង់មានរឿងតទល់ជាមួយវិមានក្រឹមឡាំងហើយ”។ ហានិភ័យនៃការប្រឈមមុខដាក់គ្នាខាងយោធាដោយផ្ទាល់រវាងមហាអំណាចនុយក្លេអ៊ែរទាំងពីរកំពុងកើនឡើងជាលំដាប់ ខណៈដែលលោកបានបញ្ជាក់ទៅកាន់ទីភ្នាក់ងារព័ត៌មានរដ្ឋរុស្ស៊ីថា រុស្ស៊ីអាចនឹងដកខ្លួនចេញពីសន្ធិសញ្ញាមីស៊ីលនុយក្លេអ៊ែររយៈចម្ងាយមធ្យម ឬខ្លី ប្រសិនបើអាម៉េរិកនៅតែបន្តការជួយដល់អ៊ុយក្រែនបែបនេះ។
សម្រង់ប្រសាសន៍លោក Yermakov “ប្រសិនបើសហរដ្ឋអាម៉េរិកបន្តអនុវត្តតាមការប្រឈមមុខដាក់គ្នានាពេលបច្ចុប្បន្នរបស់ខ្លួនជាមួយរុស្ស៊ី ភាពតានតឹងនឹងកើនឡើងឥតឈប់ឈរ រហូតអាចនឹងឈានដល់ជម្លោះប្រដាប់អាវុធដោយផ្ទាល់ នោះជោគវាសនានៃ (សន្ធិសញ្ញាអាវុធនុយក្លេអ៊ែរ) START អាចជាការសន្និដ្ឋានទុកជាមុន”។
ចាប់តាំងពីការចាប់ផ្តើមនៃការលុកលុយរបស់ វ្ល៉ាឌីមៀរ ពូទីន លើអ៊ុយក្រែនកាលពី ១៤ ខែមុន ទីក្រុងមូស្គូបានចេញការចោទប្រកាន់ជាទៀងទាត់ប្រឆាំងនឹងសហរដ្ឋអាម៉េរិក និងអ្វីដែលខ្លួនហៅថា “ក្រុមលោកខាងលិច” សម្រាប់ការបង្កើនហានិភ័យនៃសង្គ្រាមនុយក្លេអ៊ែរ ដែលជាវោហារសាស្ត្រដែលមានបំណងរារាំងសម្ព័ន្ធមិត្តរបស់ទីក្រុងគៀវ។ ការព្រមានលើកនេះ គឺជាលើកចុងក្រោយបង្អស់ហើយដែលធ្វើឡើងដោយមន្រ្តីជាន់ខ្ពស់រុស្ស៊ី៕
ប្រភព៖ Dailymail
ប្រភពរូប៖AFP
ប្រែសម្រួល៖សុខ តុលា