បាត់ដំបង៖ជនសង្ស័យម្នាក់ដែលសម្លាប់ថៅកែអេតចាយម្ដាយនិងកូន កាលពី១១ឆ្នាំមុនក្នុងក្រុងបាត់ដំបងនោះ ត្រូវសមត្ថកិច្ចខេត្តតាកែវចាប់ខ្លួនបានហើយ ខណៈរូបគេមានជម្លោះជាមួយឪពុកក្មេក។
លោក វ៉ាន់ តារា នាយរងការិយាល័យនគរបាលព្រហ្មទណ្ឌខេត្តបាត់ដំបងបានឱ្យដឹងថា ថ្ងៃទី២៤ មេសា ឆ្នាំ២០២៣ កម្លាំងនគរបាលខេត្តតាកែវ អនុត្តតាមដីកាបង្គាប់ឱ្យចាប់ខ្លួន បានឃាត់ជនសង្ស័យម្នាក់នៅភូមិពង្រ ឃុំខ្វាន់ ស្រុកទ្រាំង ខេត្តតាកែវ ពេលជននេះបានប្រើអំពើហិង្សាទៅលើឪពុកក្មេក។
រូបគេជាប់ពាក់ព័ន្ធអំពើឃាតកម្មកាលពី១១ឆ្នាំមុន រួចសមត្ថកិច្ចខេត្តតាកែវបានប្រគល់ឱ្យនគរបាលខេត្តបាត់ដំបងដើម្បីបន្តនីតិវិធី។ ជនសង្ស័យឈ្មោះ ច្រាញ់ អឿម អាយុ៣៤ឆ្នាំ នៅភូមិជ្រៃកោង សង្កាត់ស្លាកែត ក្រុងបាត់ដំបង។បុរសរូបនេះបានប្រើកាំបិតអារកសម្លាប់ថៅកែ អេតចាយម្ដាយនិងកូនស្រី នៅក្នុងបន្ទប់ដែលគេអះអាងថាផ្ដើមចេញពីរឿងគំនុំ។
អំពើឃាតកម្មដ៏សាហាវព្រៃផ្សៃនោះបានកើតឡើងនៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង កាលពីថ្ងៃទី៤ ខែធ្នូ ឆ្នាំ២០១២។ជនត្រូវចោទបានសារភាពថា កាលនោះខ្លួនពិតជាបានសម្លាប់ថៅកែអេតចាយម្ដាយនិងកូនស្រីមែន។
ក្រោយពីសម្លាប់ថៅកែអេតចាយរួច ខ្លួនបានរត់ទៅប្រទេសថៃ រហូតដល់អំឡុងឆ្នាំ២០២០ ចំពេលផ្ទុះជំងឺកូវីដ១៩ ទើបខ្លួនលួចត្រឡប់មកវិញ។ពេលត្រឡប់ចូលស្រុកខ្មែរ ខ្លួនមិនបានស្នាក់នៅខេត្តបាត់ដំបងទេ គឺគេចទៅរស់នៅជាមួយប្រពន្ធនៅឯខេត្តតាកែវ រហូតមកដល់ថ្ងៃសមត្ថកិច្ចចាប់ខ្លួន៕ដោយ៖វិចិត្រ
