កំពង់ធំ៖បុរសម្នាក់ចុះក្នុងអណ្តូងលូតាមខ្សែពួរមើលទឹកមានក្លិនស្អុយ ស្រាប់តែថប់ដង្ហើមស្លាប់។រីឯម្នាក់ទៀតឃើញដូច្នោះក៏ចុះតាម ស្រាប់តែថប់ដង្ហើមសន្លប់បាត់ស្មារតីត្រូវអ្នកភូមិនាំគ្នាជួយសង្គ្រោះ។ហេតុការណ៍នេះស្ថិតក្នុងបរិវេណវត្តសាសនៈរង្សី ហៅវត្តសំរោង ឃុំសាមគ្គី ស្រុកប្រាសាទបល្ល័ង្ក ខេត្តកំពង់ធំ កាលពីថ្ងៃទី២៤ ខែមេសា។
សមត្ថកិច្ចមូលដ្ឋានបានឱ្យដឹងថា បុរសរងគ្រោះឈ្មោះមេន មីត អាយុ១៨ឆ្នាំនៅភូមិ ឃុំខាងលើបានស្លាប់។ឈ្មោះ សឿន សៀត អាយុ៣៣ឆ្នាំ នៅភូមិឃុំជាមួយគ្នា ត្រូវបានដឹកទៅសង្គ្រោះឯមន្ទីរពេទ្យភ្លាមៗ។
ប្រភពដដែលបានបន្តថា មុនកើតហេតុអណ្ដូងទឹកក្នុងវត្តដែលធ្លាប់ប្រើប្រាស់រាល់ថ្ងៃមានក្លិនស្អុយប្រើមិនកើត។ព្រោះចង់ដឹងពីមូលហេតុ ជនរងគ្រោះឈ្មោះមេន មីត ក៏បានយកខ្សែចង ហើយសម្រូតខ្លួនចុះទៅក្នុងអណ្តូងស្រាប់តែថប់ដង្ហើមស្លាប់។ ចំណែកឈ្មោះ សឿន សៀត នៅឈរចាំមាត់អណ្ដូងឮជនរងគ្រោះស្រែកថាពិបាកដកដង្ហើមណាស់។ភា្លមនោះក៏របូតដៃពីខ្សែធ្លាក់ចូលទឹកអណ្តូងលិចបាត់តែម្ដង។
ឃើញដូច្នេះឈ្មោះសឿន សៀត បានចុះតាមប្រុងជួយ ពេលនោះចុះមិនទាន់ដល់ទឹកផងស្រាប់តែថប់ដង្ហើមត្រូវអ្នកភូមិជួយទាញយកឡើងវិញទាន់និងនាំទៅមន្ទីរពេទ្យ។ករណីនេះតាមការត្រួតពិនិត្យពីសមត្ថកិច្ចជំនាញបានបញ្ជាក់ថា សាកសពមិនមានស្លាកស្នាមអ្វីគួរឱ្យកត់សម្គាល់ទេ គឺស្លាប់ដោយសារថប់ដង្ហើមព្រោះអណ្តូងខ្វះខ្យល់អុកស៊ីហ្សែន៕ដោយ៖វិចិត្រ
