ភ្នំពេញ៖អគ្គិភ័យបានឆេះយ៉ាងសន្ធោសន្ធៅ ដោយបានបំផ្លាញផ្ទះឈើមួយខ្នង ជាមួយទ្រព្យសម្បត្តិអស់គ្មានសល់ និងងាប់ឆ្កែ៣ក្បាលជាប់ក្នុងផ្ទះនោះ តែមិនមានគ្រោះថ្នាក់ដល់មនុស្សទេ។
មន្ត្រីអាជ្ញាធរបានឱ្យដឹងថា ហេតុការណ៍នេះបានកើតឡើងនៅភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ កាលពីល្ងាចថ្ងៃទី២៣ ខែមេសា។ម្ចាស់ផ្ទះដែលភ្លើងឆេះឈ្មោះឆាង ហេង អាយុ៥៧ឆ្នាំ និងប្រពន្ធឈ្មោះព្រៃ ចាន់រំដួល អាយុ៤៣ឆ្នាំ ជាបុគ្គលិកធនាគារ។
អ្នកឃើញហេតុការណ៍បានឱ្យដឹងថា ដំបូងចរន្តអគ្គិសនីបានឆ្លងចេញពីប្រអប់នៅលើផ្ទះហើយបង្កជាផ្កាភ្លើងឆាបឆេះឡើងយ៉ាងសន្ធោសន្ធៅតែម្ដង។ម្ចាស់ផ្ទះបានស្រែកឆោឡោ អ្នកជិតខាងចេញមកជួយដែរតែភ្លើងឆេះពេញបន្ទុកទៅហើយ។
ខណៈមានអាសន្ន ស្ត្រីម្ចាស់ផ្ទះជញ្ជូនសម្ភារបានបន្តបន្តួចប៉ុណ្ណោះ ក្រៅពីនេះត្រូវភ្លើងឆេះអស់ទាំងស្រុងនិងមានឆ្កែ៣ក្បាលផងដែរបានងាប់នៅក្នុងភ្នក់ភ្លើងនោះ។ពេលភ្លើងកំពុងឆេះកម្លាំងសមត្ថកិច្ចបានចេញជួយអន្តរាគមន៍ ដោយចេញរថយន្តពន្លត់អគ្គិភ័យចំនួន៤គ្រឿងទៅកន្លែងកើតហេតុ ហើយបាញ់ទឹករហូតភ្លើងរលត់ទៅវិញ តែមិនបណ្ដាលឱ្យឆេះរាលដល់ផ្ទះអ្នកជិតខាងទេ។ចំណែកទំហំនៃការខូចខាតមន្ត្រីមូលដ្ឋានកំពុងសាកសួរ៕ដោយ៖វិចិត្រ
