ដោយ៖ សហការី
ស្ត្រីលេងសៀកជនជាតិចិនម្នាក់បានធ្លាក់ស្លាប់ក្នុងអំឡុងពេលសម្តែងឈុតដ៏រន្ធត់លោតពីលើអាកាស ដោយជឿជាក់លើសមត្ថភាពខ្លួន មិនបានរៀបចំការការពារសុវត្ថិភាព។
CNN បានឲ្យដឹងថា មានស្ត្រីជនជាតិចិនម្នាក់ជាអ្នកលេងសៀកមានត្រកូល Sun បានធ្លាក់ពីលើឆាកសម្តែងក្នុងខណៈដែលនាងកំពុងសម្តែងលើអាកាសជាមួយនឹងប្តីនៅក្នុងទីប្រជុំជនក្បែរទីក្រុង Suzhou ក្នុងខេត្ត Anhui ភាគកណ្តាលប្រទេសចិន។ រដ្ឋបាលស្រុក Tongqiao បាននិយាយនៅក្នុងសេចក្តីថ្លែងការណ៍ថា នាងត្រូវបានគេបញ្ជូនទៅមន្ទីរពេទ្យដើម្បីសង្រ្គោះជីវិត តែជាអកុសលនាងបានស្លាប់ដោយសាររបួសរបស់នាងធ្ងន់ធ្ងរពេក។
វីដេអូតាមប្រព័ន្ធអ៊ីនធឺណិតដែលបានបង្ហាញអំពីឧបទ្ទវហេតុនេះឃើញថា គូស្នេហ៍មួយគូនេះ ត្រូវបានរថយន្តស្ទូច ស្ទូចពួកគេឡើងទៅលើអាកាសនៅចំពីលើឆាកដ៏ធំមួយ ហើយស្ត្រីនោះបានកាន់ដៃប្តីរបស់នាង ដែលដៃរបស់គាត់ត្រូវបានរុំដោយកំណាត់ជាពីរកំណាត់ព្យួរទៅនឹងដងស្ទូច។ ពេលពួកគេបណ្តែតខ្លួននៅកណ្តាលអាកាស ស្ត្រីនោះបានយកដៃឱបក្បាលប្តីរបស់នាង ហើយក៏ទម្លាក់ខ្លួនផ្លាស់ប្តូរទីតាំង។ ប៉ុន្តែនាងបានរបូតដៃហើយក៏បានធ្លាក់មកលើឆាក ខណៈនោះទស្សនិកជនបានស្រែកដោយភាពតក់ស្លុតយ៉ាងខ្លាំង។ ប្តីរបស់នាងបានខិតខំតោងចាប់នាងដោយជើងរបស់គាត់ ប៉ុន្តែមិនបានសម្រេចនោះទេ។
អ្នកប្រើប្រាស់បណ្តាញសង្គមក្នុងប្រទេសចិនជាច្រើននាក់ បានចោទសួរថា ហេតុអ្វីបានជាស្ត្រីនោះមិនពាក់ខ្សែក្រវាត់សុវត្ថិភាព ហើយហេតុអ្វីបានជាគ្មានសំណាញ់សុវត្ថិភាព ឬកម្រាលពូកការពារការធ្លាក់មកលើដី។ ខ្លះទៀតបានអំពាវនាវឲ្យមានការបង្កើតច្បាប់យ៉ាងតឹងរ៉ឹងបំផុតលើអាជីវកម្មកាយសម្ព័ន្ធហៅថាសៀក និងការការពារសុវត្ថិភាពឲ្យបានល្អប្រសើរដល់អ្នកសម្តែង។
មហាជនបានផ្តល់ជាមតិនៅលើវេទិកា Weibo ក៏ដូចជានៅលើ Twitter របស់ប្រទេសចិនថា “ការសម្តែងសៀកនៅកណ្តាលអាកាសប្រភេទនេះ ពិតជាមានគ្រោះថ្នាក់ខ្លាំងណាស់។
យ៉ាងហោចណាស់ក៏ត្រូវមានដាក់ជាសំណាញ់សុវត្ថិភាព នៅខាងក្រោមដើម្បីការពារ (អ្នកសម្តែង) នៅពេលពួកគេភ្លាត់ស្នៀតធ្លាក់មកក្រោម” ។ “មិនថាអ្នកសម្តែងមានជំនាញប៉ិនប្រសប់យ៉ាងណានោះទេ គឺរមែងតែងតែមានការភ្លាត់ស្នៀតជារឿយៗ ហេតុអ្វីក៏គ្មានវិធានការការពារសុវត្ថិភាព?”៕
