ភ្នំពេញ៖រថយន្តLEXUS NX 200Tមួយគ្រឿងកំពុងបើកបរ ម្ចាស់បានឈប់ចតត្រូវភ្លើងឆាបឆេះយ៉ាងសន្ធោសន្ធៅអស់ទាំងស្រុង មិនអាចមានការជួយពន្លត់ទាន់។ករណីបង្កឱ្យមានការភ្ញាក់ផ្អើលនេះបានកើតឡើងនៅមុខស្ថានីយទូរទស្សន៍ហង្សមាស ម្តុំផ្លូវលំកែងផ្លូវថៃហ្គ័រ ឋិតក្នុងភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ កាលពីវេលាម៉ោង១០យប់ថ្ងៃទី១៩ ខែមេសា។
អ្នកភូមិបានឱ្យដឹងថា មុនកើតហេតុ គេឃើញរថយន្ត LEXUS NX 200T ផ្លាកលេខ ភ្នំពេញ2AV 8191 បានមកឈប់នៅលើផ្លូវកន្លែងខាងលើ។ក្រោយមកក៏ឮសូរសំឡេងផ្ទុះស្រាប់តែឃើញភ្លើងឆេះយ៉ាងសន្ធោសន្ធៅចេញពីផ្នែកខាងមុខនៃរថយន្ត។ពេលនោះប្រជាពលរដ្ឋបាននាំគ្នាជួយយកបំពង់អគ្គិភ័យមកបាញ់ពន្លត់ តែមិនអាចទប់ស្កាត់បានទេ។
បន្ទាប់មករថយន្ដពន្លត់អគ្គិភ័យនៃបុរីប៉េងហួតមួយគ្រឿងបានចេញជួយបាញ់ពន្លត់ប្រើទឹកអស់១រថយន្ដទើបភ្លើងរលត់ តែរថយន្តឆេះអស់ទៅហើយ។ក្នុងហេតុការណ៍នេះមិនបង្កគ្រោះថ្នាក់ដល់មនុស្សទេ។ចំពោះមូលហេតុសមត្ថកិច្ចសង្ស័យថាឆ្លងប្រព័ន្ធភ្លើង ប៉ុន្តែអ្នកភូមិបានអះអាងថា រថយន្តខាងលើត្រូវម្ចាស់បើកមកឈប់លើភ្នក់ភ្លើងសំរាម៕ដោយ៖វិចិត្រ
