អេហ្ស៊ីបយល់ព្រមផ្គត់ផ្គង់សព្វាវុធឲ្យអ៊ុយក្រែន ផ្អាកចោលការផលិតអាវុធឲ្យរុស្ស៊ី ក្រោយបានជួបចរចាជាមួយសហរដ្ឋអាម៉េរិក។
![](https://cambodiaflashnews.com/wp-content/uploads/2021/06/top-banner.gif)
នេះបើយោងតាមការចុះផ្សាយរបស់កាសែត The Washington Post។ ប្រភពនេះបាននិយាយថា កាលពីសប្តាហ៍មុនប្រធានាធិបតីអេហ្ស៊ីប Abdel Fattah el-Sisi គ្រោងនឹងផលិតគ្រាប់រ៉ុក្កែតចំនួន ៤០០០០ គ្រាប់សម្រាប់ប្រទេសរុស្ស៊ី។ ប៉ុន្តែយ៉ាងណានៅក្នុងរបាយការណ៍ថ្មីមួយកាលពីថ្ងៃព្រហស្បតិ៍ – ផ្អែកលើឯកសាររបស់មន្ទីរបញ្ចកោណដែលត្រូវបានផ្សព្វផ្សាយតាមអ៊ីនធឺណិត កាសែតនេះបាននិយាយថា អេហ្ស៊ីបបានផ្អាកការជំរុញផលិតនោះវិញហើយតាំងពីដើមខែមីនាមកម្ល៉េះ។ កាសែត Washington Post បាននិយាយថា អេហ្ស៊ីបបានប្តូរចិត្តមកយល់ព្រមលើការលក់គ្រាប់កាំភ្លើងធំទៅឱ្យសហរដ្ឋអាម៉េរិក “សម្រាប់ការផ្ទេរទៅអ៊ុយក្រែន” ដោយហៅការផ្លាស់ប្តូរនេះថាជា “ការឈ្នះការទូតជាក់ស្តែង” សម្រាប់រដ្ឋបាលរបស់ប្រធានាធិបតី Joe Biden ។
រដ្ឋបាលលោក Biden បាននិងកំពុងព្យាយាមប្រមូលផ្តុំសម្ព័ន្ធមិត្ត ដើម្បីផ្តល់ជំនួយអ៊ុយក្រែន ដោយព្រមានប្រទេសនានាជុំវិញពិភពលោក ប្រឆាំងនឹងការជួយដល់កិច្ចខិតខំប្រឹងប្រែងសង្រ្គាមរបស់រុស្ស៊ី ឬរំលោភលើការដាក់ទណ្ឌកម្មរបស់ទីក្រុងវ៉ាស៊ីនតោន ប្រឆាំងនឹងទីក្រុងមូស្គូ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា