រដ្ឋមន្រ្តីការពារជាតិអ៊ុយក្រែនសំដែងក្តីស្អប់ខ្ពើមជាអនេក នៅក្នុងការចូលខ្លួនក្នុងកិច្ចចរចាជាមួយរុស្ស៊ីនៅប្រទេសបេឡារុស ដោយថាចង់ត្រឡប់មកផ្ទះវិញខ្លាំងណាស់។
ក្នុងបទសម្ភាសន៍ជាមួយទីភ្នាក់ងារសារព័ត៌មានអេស្ប៉ាញ La Razon នាពេលថ្មីៗនេះ រដ្ឋមន្រ្តីការពារជាតិអ៊ុយក្រែនលោក Reznikov បានហៅវាថាជាថ្ងៃដ៏អាក្រក់បំផុត និងជាការសម្រេចចិត្តដ៏លំបាកបំផុត ដើម្បីជាផ្នែកមួយនៃគណៈប្រតិភូអ៊ុយក្រែន ដែលបានទៅប្រទេសបេឡារុសក្នុងថ្ងៃដំបូងនៃសង្រ្គាម។ លោកថា វាពិបាកណាស់ក្នុងការដែលទទួលតាមការចាត់តាំងរបស់ប្រធានាធិបតីឲ្យទៅកាន់ប្រទេសបេឡារុស ខណៈដែលលោកមានអារម្មណ៍ថាមានការស្អប់ខ្ពើមយ៉ាងខ្លាំងជាមួយជនជាតិរុស្ស៊ី។ “ហើយក្នុងនាមជាអ្នកចរចា គាត់ដឹងថានេះជាអារម្មណ៍ដែលមិនមានប្រយោជន៍ទាល់តែសោះ”។ លោកបន្តថា “វាជាការដ៏គួរឲ្យខ្លាចក្នុងការចាប់ដៃជាមួយនឹងសត្រូវ”។
តាមការកត់សម្គាល់របស់រដ្ឋមន្រ្តីអ៊ុយក្រែននេះ គោលបំណងនៃកិច្ចពិភាក្សាគឺបង្កើតច្រករបៀងមនុស្សធម៌ ដែលបានជួយសង្គ្រោះជីវិតមនុស្សរាប់ម៉ឺននាក់។ កិច្ចប្រជុំទាំងអស់មានចំនួនបួន ក្នុងនោះមានបីនៅបេឡារុស និងមួយនៅប្រទេសតួកគី។ លោកបន្ថែមថា “ខ្ញុំអាចប្រាប់អ្នកថាក្នុងចំណោមបីដំបូង យើងមិនមានអារម្មណ៍សុវត្ថិភាពទាល់តែសោះ ហើយថែមទាំងសង្ស័យថាយើងនឹងមិនអាចត្រឡប់មកផ្ទះវិញទៀតផង”៕
ប្រភព៖ Ukrainska Pravda
ប្រភពរូប៖ Ukrainska Pravda
ប្រែសម្រួល៖សុខ តុលា
