កូរ៉េខាងត្បូង សហរដ្ឋអាម៉េរិក និងជប៉ុន នៅថ្ងៃចន្ទនេះបានប្រកាសធ្វើសមយុទ្ធបាញ់មីស៊ីល​ការពារជើងទឹក ក្នុងកិច្ចសហប្រតិបត្តិការផ្នែកសន្តិសុខឆ្លើយតបឲ្យកាន់តែខ្លាំងចំពោះការគំរាម​កំហែងកាំជ្រួច​របស់កូរ៉េខាងជើង។

សមយុទ្ធថ្ងៃចន្ទក្នុងដែនទឹកអន្តរជាតិរវាងកូរ៉េ និងជប៉ុននេះ នាំយកនាវាពិឃាត Aegis Yulgok Yi I ទម្ងន់ ៧៦០០ តោនរបស់កូរ៉េខាងត្បូង, នាវាពិឃាត Benfold របស់សហរដ្ឋអាម៉េរិក និងនាវាពិឃាត Atago របស់ជប៉ុន ដែលបំពាក់ដោយប្រព័ន្ធរ៉ាដា Aegis ផងដែរ។ កងទ័ពជើងទឹកកូរ៉េខាងត្បូងបាននិយាយថា កិច្ចខិតខំប្រឹងប្រែងផ្តោតលើការធ្វើជាម្ចាស់នៃនីតិវិធីឆ្លើយតប ចាប់ពីការរកឃើញ និងការតាមដានរហូតដល់ការចែករំលែកព័ត៌មាន ដោយបង្កើតគោលដៅនិម្មិតនៅក្នុងសេណារីយ៉ូ​ដែលបង្ហាញពីការញុះញង់មីស៊ីលផ្លោងរបស់កូរ៉េខាងជើង។ កាពីទែន Kim Ki-young នៃនាវាពិឃាតកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា “វាគឺជាឱកាសមួយដើម្បីពង្រឹងកិច្ចសហប្រតិបត្តិការសន្តិសុខត្រីភាគីប្រឆាំងនឹងការគំរាមកំហែងនុយក្លេអ៊ែរ និងកាំជ្រួចរបស់កូរ៉េខាងជើង”។ “នេះនឹងពង្រឹងសមត្ថភាព និងជំហររបស់កងទ័ពជើងទឹក ដើម្បីឆ្លើយតបទៅនឹងមីស៊ីលផ្លោង”។ បន្ថែមពីលើសមយុទ្ធ អាម៉េរិក និងកូរ៉េខាងត្បូងក៏មានសមយុទ្ធដាច់ដោយឡែកមួយទៀតរយៈពេល១២ថ្ងៃផងដែរ។

ដំណឹងនេះបានកើតឡើងប៉ុន្មានថ្ងៃបន្ទាប់ពីប្រទេសទាំងបីបានព្រមព្រៀងគ្នានៅក្នុងកិច្ចពិភាក្សានៅទីក្រុងវ៉ាស៊ីនតោនដើម្បីធ្វើសមយុទ្ធការពារមីស៊ីល និងប្រឆាំងនាវាមុជទឹកជាប្រចាំក្នុងកិច្ចខិតខំប្រឹងប្រែង​របស់ពួកគេក្នុងការជំរុញកិច្ចសហប្រតិបត្តិការការទូត និងយោធា។ វាក៏បន្ទាប់ពីទីក្រុងព្យុងយ៉ាង​បានពិពណ៌នាសកម្មភាពបាញ់មីស៊ីលរបស់ខ្លួនថាជាការហាត់សមសម្រាប់សង្គ្រាមនុយក្លេអ៊ែរ ត្រៀមធ្វើសង្រ្គាមជាមួយអាម៉េរិក និងកូរ៉េខាងត្បូង៕

ប្រភព៖ REUTERS

ប្រភពរូប៖REUTERS
ប្រែសម្រួល៖សុខ តុលា