ភ្នំពេញ៖រថយន្តម៉ាក Mercedes បានបើកបុករបាំងថ្មការដ្ឋានសាងសង់ស្ពានអាកាសផ្លូវ៦០ ម៉ែត្របណ្តាលឱ្យរងការខូចខាតយ៉ាងដំណំ។គ្រោះថ្នាក់ចរាចរនេះបានកើតឡើងនៅម្តុំការដ្ឋានកំពុងសាងសង់ស្ពានផ្លូវ៦០ម៉ែត្រ ស្ថិតក្នុងសង្កាត់ចាក់អង្រែលើ ខណ្ឌមានជ័យ កាលពីរំលងអធ្រាត្រចូលថ្ងៃទី១២ ខែមេសា។
សាក្សីបានឱ្យដឹងថា មុនកើតហេតុគេបានឃើញរថយន្តទំនើបម៉ាក Mercedes ផ្លាកលេខភ្នំពេញ2BC-5454 បើកតាមផ្លូវ៦០ម៉ែត្រពីត្បូងទៅជើងក្នុងល្បឿនលឿន។មកដល់កន្លែងខាងលើអ្នកបើកបរទំនងមិនបានប្រុងប្រយ័ត្នក៏បុករបាំងថ្ម ការដ្ឋានកំពុងសាងសង់ស្ពានអាកាសនោះពេញទំហឹង បណ្តាលឱ្យរថយន្តរងការខូចខាតផ្នែកខាងមុខយ៉ាងដំណំ។
ប៉ុន្តែហេតុការណ៍នេះមិនបានបង្កគ្រោះថ្នាក់ដល់មនុស្សទេ។ក្រោយមកសមត្ថកិច្ចបានចុះអន្តរាគមន៍និងបន្តនីតិវិធី៕ដោយ៖វិចិត្រ
