របបសឹកមីយ៉ាន់ម៉ា បើកការវាយប្រហារតាមផ្លូវអាកាសក្នុងតំបន់ Sagaingភាគកណ្តាល សម្លាប់មនុស្សយ៉ាងហោចណាស់៥០នាក់ និងរបួសរាប់សិបនាក់នៅថ្ងៃអង្គារសប្តាហ៍នេះ។
![](https://cambodiaflashnews.com/wp-content/uploads/2021/06/top-banner.gif)
យោងតាមសេចក្តីរាយការណ៍ដោយកាសែត BBC ភូមា, សារព័ត៌មាន Irrawaddy និងពិសេសសាក្សីដោយទីភ្នាក់ងារសារព័ត៌មាន AFP បានឲ្យដឹងថា យ៉ាងហោចណាស់ មនុស្ស៥០នាក់ស្លាប់ និងរបួសរាប់សិបនាក់នៅក្នុងការវាយប្រហារយ៉ាងសាហាវតាមផ្លូវអាកាសរបស់របបយោធាមីយ៉ាន់ម៉ា ដឹកនាំដោយលោកឧត្តមសេនីយ៍មីនអ៊ុងឡាំង។ ការវាយប្រហារនេះបានកើតឡើងនៅព្រឹកថ្ងៃអង្គារទី ១១ ខែមេសា ឆ្នាំ២០២៣ លើទីប្រជុំជន Kanbalu ដាច់ស្រយាលក្នុងតំបន់ Sagaing កណ្តាលនៃប្រទេសមីយ៉ាន់ម៉ា។
អ្នកនាំពាក្យយោធាលោក Zaw Min Tun បាននិយាយថា “មាន (កងកម្លាំងការពារប្រជាជន) ពិធីបើកសម្ពោធការិយាល័យនៅថ្ងៃអង្គារ នៅម៉ោងប្រហែល ៨ព្រឹក នៅភូមិ Pazi Gyi” ។ “យើងបានបើកការវាយប្រហារនៅទីនោះ”។ ចំពោះអ្នកស្លាប់ និងរបួស អ្នកនាំពាក្យរូបនេះនៅតែប្រកាន់ជំហរយ៉ាងដាច់អហង្ការមិនទទួលខុសត្រូវឡើយ ដោយថាអ្នកស្លាប់មួយចំនួនជាអ្នកប្រឆាំងរដ្ឋប្រហារក្នុងឯកសណ្ឋានស៊ីវិល មានអ្នកខ្លះស្លៀកពាក់ស៊ីវិល។
ប្រធានផ្នែកសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយថា លោកមានការ “រន្ធត់ណាស់” ចំពោះការវាយប្រហារតាមអាកាសដ៏សាហាវនេះ ដែលជនរងគ្រោះ រួមមានក្មេងៗសិស្សសាលាគ្មានកំហុសកំពុងសំដែងរបាំ។
យោងតាមសេចក្តីថ្លែងការណ៍របស់អ្នកនាំពាក្យរបស់លោក Stephane Dujarric អគ្គលេខាធិការអង្គការសហប្រជាជាតិ លោក Antonio Guterres “ថ្កោលទោសយ៉ាងខ្លាំងចំពោះការវាយប្រហារដោយកងកម្លាំងប្រដាប់អាវុធមីយ៉ាន់ម៉ានេះ”។ អ្នកនាំពាក្យរូបនេះបានបន្ថែមថា លោក Guterres “បញ្ជាក់សាជាថ្មីនូវការអំពាវនាវរបស់គាត់ឱ្យយោធាបញ្ចប់យុទ្ធនាការនៃអំពើហិង្សាលើប្រជាជនមីយ៉ាន់ម៉ានៅទូទាំងប្រទេស”៕
ប្រភព៖ AFP
ប្រភពរូប៖AFP
ប្រែសម្រួល៖សុខ តុលា