ព្រះសីហនុ៖ គណៈបញ្ជាការឯកភាពក្រុង និងកម្លាំងនគរបាលខេត្តព្រះសីហនុ បានត្រួតពិនិត្យឆែកឆែរអាវុធជាតិផ្ទុះ ក៏ឃើញគ្រឿងញៀនជាង២០០កញ្ចប់ ក្នុងរថយន្តជនជាតិចិន២នាក់។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុឱ្យដឹងថា កាលពីយប់ថ្ងៃ១០ ខែមេសា គណៈបញ្ជាការឯកភាពរដ្ឋបាលក្រុងព្រះសីហនុ និងនគរបាលបានត្រួតពិនិត្យ និងឆែកឆេរអាវុធជាតិផ្ទុះតាមផ្លូវ។ពេលនោះកម្លាំងបានត្រួតពិនិត្យរថយន្ត១គ្រឿងម៉ាកឡង់គ្រីស័រផ្លាកលេខភ្នំពេញ 2BU-1278 បើកបរដោយបុរសចិននិងអ្នករួមដំណើរម្នាក់។
សមត្ថកិច្ចបានរកឃើញគ្រឿងញៀនមួយចំនួនធំលាក់ទុកក្នុងរថយន្តនេះ។ក្នុងនោះមានកញ្ចប់ពណ៌ខៀវរូបទំពាំងបាយជូរ crispy fruit ចំនួន២០០កញ្ចប់-កញ្ចប់រូបតុក្កតា១៥កញ្ចប់ -កញ្ចប់ពណ៌ខ្មៅ១០កញ្ចប់និងម្សៅក្រាម១កញ្ចប់ ។
ក្រោយពីឆែកឆេររួច សមត្ថកិច្ចបានឃាត់ខ្លួនជនសង្ស័យជនជាតិចិនទាំង២នាក់ ជាមួយវត្ថុតាងហើយនាំយកទៅសាកសួរបន្ថែមនិងកសាងសំណុំរឿងត្រៀមបញ្ជូនទៅតុលាការ៕ដោយ៖វិចិត្រ
