ដោយៈសិរីមតី
តាកែវ៖ក្រុមគ្រួសារសប្បុរសមួយបានបរិច្ចាគដីធ្លីនិងរួមគ្នារៃអង្គាសថវិកាដើម្បីយកមកកសាងសាលាបុណ្យមួយសម្រាប់ដាក់ជាប្រយោជន៍រួមនៅក្នុងភូមិ និងអាចប្រើប្រាស់ជាកន្លែងស្នាក់អាស្រ័យដល់មនុស្សទូទៅ សម្រាកលំហែនិងជ្រកម្លប់ពេលធ្វើដំណើរ ព្រមទាំងជាកន្លែងសម្រាប់ធ្វើពិធីបុណ្យ កន្លែងជួបប្រជុំ និងកម្មវិធីផ្សេងៗ។សាលាបុណ្យធ្លកយុលនេះចំណាយថវិកាប្រមាណ២ម៉ឺនដុល្លារ ស្ថិតនៅក្នុងភូមិត្រពាំងចំការ ឃុំត្រពាំងក្រសាំង ស្រុកបាទី ខេត្តតាកែវ។
សាលាឆទានតម្លៃជិត២ម៉ឺនដុល្លារនេះ ជាការចូលរួមចំណែករបស់ឯកឧត្តម អុិន ណាង និងក្រុមគ្រួសារកូនចៅឧបាសក អោ អុិន និងឧបាសិកា ឡុច ភិន ព្រមទាំងសាច់សាលោហិតជាច្រើនរូបទៀត។
ពិធីសម្ពោធឆ្លងពុទ្ធាភិសេក សាលាបុណ្យធ្លកយុលនេះ បានត្រូវប្រារព្ធធ្វើឡើង កាលពីថ្ងៃទី៩ ខែ មេសា ឆ្នាំ ២០២៣ ក្រោមវត្តមានឯកឧត្តម គង់ ចាន់ណា ទីប្រឹក្សារាជរដ្ឋាភិបាល និងជាក្រុមការងារគណបក្សប្រជាជនចុះមូលដ្ឋានខេត្តបន្ទាយមានជ័យ និងជាប្រធានផែនសហគ្រិនវ័យក្មេងនៃគណបក្សប្រជាជនប្រចាំខេត្តកំពត, ឯកឧត្តម អុិន ណាង ទីប្រឹក្សារាជរដ្ឋាភិបាលនៃទីស្តីការគណៈរដ្ឋមន្ត្រី និងជាអនុប្រធានផែនសហគ្រិនវ័យក្មេងនៃគណបក្សប្រជាជនប្រចាំខេត្តកំពត ,លោកជំទាវ រស់ សុភារ៉ាវី ប្រធានក្រុមការងារចុះមូលដ្ឋានឃុំត្រពាំងក្រសាំង និងលោក ភួន ឈឹម អភិបាល ស្រុកបាទី ព្រមទាំងលោកយាយលោកតា លោកគ្រូអ្នកគ្រូ សិស្សានុសិស្ស និងប្រជាពលរដ្ឋ។
ក្នុងពិធីសម្ពោធដាក់ឱ្យប្រើប្រាស់សាលាបុណ្យធ្លកយុលនេះ លោក អិុន ប៉ែន ដែលជាម្ចាស់ដើមបុណ្យបានមានប្រសាសន៍ឱ្យដឹងថា៖សាលានេះកសាងដោយក្រុមកូនចៅរបស់លោកឪពុក អោ អុិន អ្នកម្ដាយ ឡុច ភិន ដោយចំណាយថវិកាអស់ប្រមាណ២ម៉ឺនដុល្លារអាមេរិក។ យើងមានដីកេរ្តិ៍របស់គាត់ចំនួន ៤៥ × ៤៥ម៉ែត្រ មានស្រះទឹក១ និង សាលានេះមានបណ្តោយ ៨.៥ម ទទឹង ៦.៩ម ។
លោកបានបញ្ជាក់ថា៖ការសាងសង់សាលាបុណ្យនេះ គឺថវិការួមគ្នារបស់ក្រុមកូនចៅ បងប្អូន ពូមីង ប៉ុណ្ណោះ ពុំបានយកប្រាក់បដិភាគពីប្រជាពលរដ្ឋ ក្នុងភូមិនេះឡើយ។
ទាក់ទងនឹងប្រវត្តិធ្វើសាលាបុណ្យនេះ លោក អុិន ប៉ែន បានឱ្យដឹងថា៖កាលពីខាងដើមឡើយភូមិនេះឈ្មោះភូមិធ្លកយុលនិងភូមិ ត្រពាំងចំការ គឺចែកចេញពីគ្នាដាច់ស្រឡះ ខាងជើងខាងត្បូង។ ក្នុងជំនាន់៣ ឆ្នាំ ៨ខែ ២០ថ្ងៃ គេបានដាក់ឈ្មោះភូមិទាំងពីរនេះទៅជាភូមិព្រែកថ្មី តែមួយព្រម ទាំងបានជម្លៀសប្រជាពលរដ្ឋអស់មួយចំនួនធំពុំមាននៅទីនេះច្រើន ប៉ុន្មាននោះទេ។ ក្រោយថ្ងៃរំដោះ៧ មករាប្រជាពលរដ្ឋបានវិលត្រឡប់មករួមរស់វិញមួយចំនួនដោយដីខាងត្បូងនេះជាដី ៥៤ ឬឯដីខាងជើងជាដី ៥៦ របស់ពួកគាត់។
លោកបានបន្តថា៖ដោយគុណ គណបក្សប្រជាជនកម្ពុជាបានឲ្យប្រជាពលរដ្ឋត្រឡប់មកសង់លំនៅដ្ឋានក្នុងភូមិកំណើតរបស់ខ្លួនវិញព្រមទាំងបាន ដាក់ឈ្មោះភូមិនានានៅក្នុងឃុំដោយឡែកបាត់ឈ្មោះភូមិធ្លកយុលនេះតែម្ដង។យើងខ្ញុំបានដាក់ពាក្យសំណើរសុំទៅខាងលើតែពុំបានធ្លាក់ឈ្មោះភូមិធ្លក យុលនេះទេ។ ទើបពេលនេះលោករួមទាំងបងប្អូន សម្រេចកសាងសាលានេះទុកជា កេរ្តិ៍មរតកនៃភូមិផងសម្រាប់ឲ្យប្រជាពលរដ្ឋធ្វើដំណើរស្នាក់ អាស្រ័យផង ជា ទីសក្ការៈផងព្រមទាំងប្រជាពលរដ្ឋកំណើនកើនច្រើននៅក្នុងភូមិត្រពាំងចំការ នេះមានចំនួន ១ពាន់ ២៥នាក់ ក្នុងនោះស្រី៥២៤ នាក់ ហើយ ក្រែងថ្ងៃខាង មុខទៅតម្រូវការជាកន្លែងបោះឆ្នោត ឬ ក៏ជាការិយាល័យផ្សេងៗ យើងមាន ស្រាប់ជូនរដ្ឋជាពិសេសគណបក្សប្រជាជន កម្ពុជារបស់យើង។
ទាក់ទងនឹងការកកើតនៃសមិទ្ធិផលនេះ ឯកឧត្តម អុិន ណាង ទីប្រឹក្សារាជរដ្ឋាភិបាលនៃទីស្តីការគណៈរដ្ឋមន្ត្រី និងជាម្ចាស់ដើមបុណ្យដែរនោះ បានមានប្រសាសន៍ជម្រាបថា៖ក្រុមគ្រួសាររបស់លោកបានពិភាក្សាផ្តួចផ្តើមជាគំនិត និងកៀងគរថវិកាពីសមាជិកគ្រួសារ សាងសង់សាលាបុណ្យមួយនេះ សម្រាប់ជា ប្រយោជន៍រួម និងជាទីកន្លែងស្នាក់អាស្រ័យរបស់មនុស្សទូទៅសម្រាប់សម្រាកលំហែរកាយពេលធ្វើដំណើរអស់កម្លាំងផ្លូវជិតផ្លូវឆ្ងាយ។ ក្នុងជីវភាពរស់នៅរបស់ប្រជាជនសព្វថ្ងៃនេះ នៅតាមទីប្រជុំជននីមួយៗ គេតែងត កសាងសាលាបុណ្យ ឬ (សាលាឆទាន) នេះឡើង ក្នុងន័យជាទីកន្លែងប្រមូលផ្តុំមនុស្សក្នុងភូមិដើម្បីជាទីគោរព សក្ការៈ និងប្រារព្ធពិធីផ្សេងៗ ដែលអ្នកភូមិបានមូលមតិគ្នារៀបចំឡើង។ជាពិសេសសម្រាប់ធ្វើពិធីបុណ្យទាំងឡាយណាដែលជាពិធីប្រចាំភូមិផ្ទាល់តែម្តង ឧទាហរណ៍ដូចជា បុណ្យឡើងមាឃ សម្ភោធភូមិ និងស្រង់ ព្រះក្នុងឱកាសចូលឆ្នាំថ្មីជាដើម។
ម្យ៉ាងទៀតសាលាបុណ្យនេះសាងសង់ឡើងដោយសារមានអ្នកភូមិខ្លះនៅឆ្ងាយដាច់ស្រយាលមិនមានវត្តអារាមនៅក្បែរគឺទីនេះយើងប្រើប្រាស់ជាកន្លែសម្រាប់និមន្តព្រះសង្ឃក្នុងការធ្វើកិច្ចផ្សេងៗដូចជាពិធីសុំសីល៍រៀងរាល់ថ្ងៃសីល៍និងពិធីកាន់បិណ្ឌជាដើម។ដោយឡែកនៅក្នុងឱកាសសង្ក្រាន្តឆ្នាំថ្មីឆ្នាំ២០២៣នេះ យើងក៏ អាចរៀបចំពិធីបុណ្យចូលឆ្នាំថ្មីប្រពៃណ៍ជាតិក្នុងបរិវេណសាលានេះ ដោយតុបតែងលំអ និងម៉ូដផ្ទះតាមលំនាំរចនាបទប្រពៃណីបុរាណខ្មែរយើង។ហេតុដូច្នេះហើយបានជាក្រុមគ្រួសាររបស់យើងខ្ញុំសម្រេចចិត្តសាងសង់សាលាមួយខ្នងនេះសម្រាប់ព្រះសង្ឃ ដូនជី តាជី ឧបាសក ឧបាសិកា ប្រជាពលរដ្ឋទីជិតទីឆ្ងាយ បានប្រើប្រាស់រួមទាំងអស់គ្នាឱ្យខាងតែបាន។ សម្រាប់ការសាងសង់សាលាមួយនេះយើងបានចំណាថវិកាប្រមាណ២ម៉ឺនដុល្លារអាមេរិក លើផ្ទៃដីសរុប២០០០ម៉ែត្រការ៉េ។សាលាបុណ្យនេះ មានបណ្តោយ ៨,៥x៦.៩ ម៉ែត្រ និងមានស្រះទឹក១ ផងដែរ។
ក្នុងនាមជាកូន ជាចៅនិងជាប្រជាពលរដ្ឋមួយរូបដែលបានចាប់កំណើតនៅលើទឹកដីស្រុកកំណើតនេះផ្ទាល់ ហើយបាន រស់នៅ សិក្សារៀនសូត្រ ទទួលបានការអប់រំ បណ្តុះបណ្តាល និងទូន្មានព្រាន ប្រដៅ ពីលោកគ្រូអ្នកគ្រូអស់រយៈកាលច្រើនឆ្នាំ លោកសូមធ្វើការរំលឹកគុណនិងដឹងគុណនិងសូមឧទ្ទិសផលបុណ្យនិងជូនកុសលដល់លោកអ្នកមានគុណទាំងអស់របស់លោកដែលជាអ្នកផ្ដើមបុណ្យរួមមាន៖លោកស្រី ហ៊ិន រេនព្រមទាំងកូនចៅ,លោក ប៊ុន ណេន និងអ្នកស្រីងួន ឡាវ ព្រមទាំងកូនចៅ, លោក អុិន ប៉ែន និងអ្នកស្រី ស្រ៊ុន គីមងួន ព្រមទាំងកូនចៅ, លោក យូ ពឿន និង អ្នកស្រី ខឹក ណន ព្រមទាំងកូនចៅ, លោក អោ កុសល និងអ្នកស្រី ប៉ៃ លីមហៀក ព្រមទាំងកូនចៅ, ក្រុមកូនចៅឧបាសក យូ ពូក និងឧបាសិកា កង សំអឿនជាពិសេស លោកតា អោ អុិន និងលោកយាយឡុច ភិន ដែលបានបន្សល់និងបរិច្ចាគដីសម្រាប់សាងសង់ សាលាបុណ្យ សំរាប់ជាកន្លែង គោរពសក្ការៈបូជា និងជាប្រយោជន៍ដល់មូលដ្ឋាន និងសាធារណជនទូទៅ។
ឯកឧត្តម គង់ ចាន់ណា ទីប្រឹក្សារាជរដ្ឋាភិបាល បានថ្លែងកោតសរសើរដល់ក្រុមគ្រួសារឧបាសក អោ អុិន និង ឧបាសិកា ឡុច ភិន ដែលបានលះបង់ធនធានផ្ទាល់ខ្លួនដែលមានដីទំហំ២០០០ម៉ែត្រការ៉េបើគិតតម្លៃទីផ្សារប្រមាណ៩ម៉ឺនដុល្លារសម្រាប់កសាងសាលាបុណ្ដើម្បីទុកជាប្រយោជន៍រួម។
ឯកឧត្តមក៏សូមអរគុណដល់សប្បុរសជនជាអ្នកផ្ដើមបុណ្យទាំងអស់ដែលបានបរិច្ចាគថវិកាផ្ទាល់ខ្លួនរៃអង្គាសថវិកាបានចំនួនប្រមាណ២ម៉ឺនដុល្លារអាមេរិកដើម្បីសាងសង់សាលាបុណ្យសម្រាប់ទុកជាប្រយោជន៍ដល់ប្រជាពលរដ្ឋទូទៅនិងអបអរសាទរដល់ប្រជាជននៅក្នុងភូមិដែលទទួលបានសមិទ្ធផលទាំងនេះ។
ឯកឧត្តមបានបានបញ្ជាក់ថាសមិទ្ធផល ការរីកចម្រើននៅក្នុងស្រុកភូមិនិងការរស់នៅសុខសុវត្ថិភាព ការប្រកបរបរទទួលទានមានបានរបស់ប្រជាពលរដ្ឋគឺបានមកពីសន្តិភាព។
នៅក្នុងពិធីសម្ពោធឆ្លងពុទ្ធាភិសេក សាលាបុណ្យធ្លកយុលនេះ ម្ចាស់ដើមបុណ្យ ក៏បានផ្តល់អំណោយជាសម្ភារ និងថវិកាជូនដល់អ្នកចូលរួម ផងដែរ៕
