ការស្ទង់មតិថ្មីដោយភ្នាក់ងារឯករាជ្យបានបង្ហាញថា ស្ទើរតែពាក់កណ្តាលនៃប្រជាជនអាម៉េរិកគិតថាលោកដូណាល់ត្រាំគួរតែផ្អាកយុទ្ធនាការបោះឆ្នោតឆ្នាំ ២០២៤ បន្ទាប់ពីការចោទប្រកាន់ប្រឈមមុខច្បាប់បានកើនឡើងច្រើនករណីគួរឲ្យកត់សម្គាល់។
ការស្ទង់មតិថ្មីចេញដោយកាសែត ABC News / Ipsos ថ្មីៗនេះបានរកឃើញថា ៤៨% នៃជនជាតិអាម៉េរិកគិតថា ត្រាំគួរតែផ្អាកយុទ្ធនាការជាប្រធានាធិបតី។ ការស្ទង់មតិបានរាយការណ៍ថា ៥៣% នៃអ្នកឆ្លើយតបគិតថា សកម្មភាពរបស់លោកត្រាំមានចេតនាខុសច្បាប់។ ២០% នៃអ្នកបោះឆ្នោតជឿថា Trump មិនបានធ្វើអ្វីខុសទេ ខណៈដែល ១១% បាននិយាយថា វាមិនមែនជាចេតនាខុសច្បាប់នោះទេ។
ជិតពាក់កណ្តាលនៃអ្នកឆ្លើយសំណួរ ៤៧% ជឿថាការចោទប្រកាន់នេះគឺមានហេតុផលនយោបាយ ដោយ ៣២% និយាយថានយោបាយមិនដើរតួក្នុងការស៊ើបអង្កេតឧក្រិដ្ឋកម្មនោះឡើយ។
លោកដូណាល់ត្រាំ អតីតប្រធានាធិបតីអាម៉េរិក ត្រូវបានតុលាការទីក្រុងញូវយ៉កកាលពីថ្ងៃអង្គារ ចោទប្រកាន់បន្ថែម៥បទល្មើសពីលើបទចោទប្រកាន់ប្រើលុយបំបិទមាត់តារាស្រីអាសអាភាស Stormy Daniels ក្នុងយុទ្ធនាការបោះឆ្នោតឆ្នាំ២០១៦ ជាប់ឈ្មោះក្នុងប្រវត្តិសាស្រ្តជាអតីតប្រធានាធិបតីដែលជាប់ការចោទប្រកាន់បទឧក្រិដ្ឋ៕
ប្រភព៖ FOX NEWS
ប្រភពរូប៖FOX NEWS
ប្រែសម្រួល៖សុខ តុលា
