សហរដ្ឋអាម៉េរិកបើកការស៊ើបអង្កេតយ៉ាងហ្មត់ចត់ រួមទាំងទៅលើប្រទេសដែលជាសម្ព័ន្ធមិត្តរបស់ខ្លួន ក្រោយឯកសារសម្ងាត់ស្តីពីគម្រោងប្រតិបត្តិការជួយអ៊ុយក្រែនត្រូវបានបែកធ្លាយ។

សហរដ្ឋអាម៉េរិកកំពុងព្យាយាមកំណត់អត្តសញ្ញាណប្រភពនៃការលេចធ្លាយឯកសារដែលមានចំណាត់ថ្នាក់ខ្ពស់ អាចបង្ហាញឱ្យឃើញនូវព័ត៌មានលម្អិតដ៏រសើបអំពីសម្ព័ន្ធមិត្តរបស់សហរដ្ឋអាម៉េរិក រួមទាំងភាពងាយរងគ្រោះរបស់អ៊ុយក្រែនក្នុងសង្គ្រាម ជាមួយរុស្ស៊ី។ មន្ទីរបញ្ចកោណបាននិយាយកាលពីថ្ងៃអាទិត្យទី ៩ ខែមេសាថា ខ្លួនបានធ្វើការបញ្ជូនជាផ្លូវការទៅកាន់នាយកដ្ឋានយុត្តិធម៌ ដោយសុំឱ្យស៊ើបអង្កេតការលេចធ្លាយឯកសារជាក់ស្តែង ដែលត្រូវបានផ្សព្វផ្សាយនៅលើបណ្តាញទំនាក់ទំនងសង្គម រួមទាំងបណ្តាញសង្គមធ្វីតធ័រផងដែរ។

ឯកសារដែលស្រដៀងនឹងការអាប់ដេតប្រចាំថ្ងៃមិនមែនផលិតដោយបុគ្គលិករួមរបស់យោធាអាម៉េរិក ហាក់ដូចជាមានព័ត៌មានសម្ងាត់ទាក់ទងនឹងអ៊ុយក្រែន ចិន មជ្ឈិមបូព៌ា និងអាហ្វ្រិក។ ការលេចធ្លាយនេះហាក់ដូចជាបង្ហាញថាទីក្រុងវ៉ាស៊ីនតោនកំពុងធ្វើចារកម្មលើសម្ព័ន្ធមិត្តជិតស្និទ្ធរបស់សហរដ្ឋអាម៉េរិក រួមទាំងអ៊ុយក្រែន កូរ៉េខាងត្បូង និងអ៊ីស្រាអែល ដែលជាការបង្ហាញដ៏គួរឱ្យអាម៉ាស់មួយសម្រាប់រដ្ឋបាលរបស់ប្រធានាធិបតីអាម៉េរិក Joe Biden ។ ទោះជាយ៉ាងណាក៏ដោយ ឯកសារទាំងនោះហាក់ដូចជាមានកំហុសឆ្គងមួយចំនួន រួមទាំងការប៉ាន់ប្រមាណអំពីជនរងគ្រោះនៅសមរភូមិ ការខាតបង់របស់រុស្ស៊ីមានចំនួនតិច។ ការិយាល័យប្រធានាធិបតីអ៊ុយក្រែនបាននិយាយថា ឯកសារដែលលេចធ្លាយមាន “ព័ត៌មានប្រឌិត” យ៉ាងច្រើន និងជាសញ្ញាសម្គាល់នៃយុទ្ធនាការផ្សព្វផ្សាយព័ត៌មានមិនពិតរបស់រុស្ស៊ី៕

ប្រភព៖  ALJAZEERA

ប្រភពរូប៖ALJAZEERA
ប្រែសម្រួល៖សុខ តុលា