ក្រុមហ៊ុនរថយន្តអគ្គិសនីអាម៉េរិកតេស្លារបស់មហាសេដ្ឋីអ៊ីលនម៉ាស នឹងបើករោងចក្រផលិតថ្មីនៅក្នុងទីក្រុងសៀងហៃប្រទេសចិន ដោយនឹងដំណើរការនៅឆ្នាំ២០២៤។
នេះបើតាមគេហទំព័រក្រុមហ៊ុនបាននិយាយក្នុងការបង្ហោះសារនៅថ្ងៃអាទិត្យទី ៩ ខែមេសា ឆ្នាំ២០២៣។ ក្រុមហ៊ុនរថយន្តអគ្គិសនី Tesla Inc កំពុងបើករោងចក្រនៅទីក្រុងសៀងហៃ ដែលមានសមត្ថភាពផលិតផលិតផលរថយន្តថាមពល Megapack មួយម៉ឺនគ្រឿងក្នុងមួយឆ្នាំ ដើម្បីបន្ថែមទិន្នផលរោងចក្រ Megapack ក្នុងរដ្ឋ California។
សារព័ត៌មានស៊ីនហួរបានរាយការណ៍ពីពិធីចុះហត្ថលេខានៅទីក្រុងសៀងហៃថា ក្រុមហ៊ុន ផលិតរថយន្តរបស់ Elon Musk នឹងចាប់ផ្តើមដំណើរការរោងចក្រនៅត្រីមាសទីបី ហើយចាប់ផ្តើមផលិតនៅត្រីមាសទីពីរនៃឆ្នាំ ២០២៤ ។
ទីភ្នាក់ងារ Xinhua បាននិយាយទៀតថា ដោយបំពេញបន្ថែមរោងចក្រសៀងហៃដែលមានស្រាប់ដ៏ធំមួយដែលផលិតរថយន្តអគ្គិសនី រោងចក្រថ្មីនេះនឹងផលិតដំបូង ១០០០០ Megapack ក្នុងមួយឆ្នាំ ស្មើនឹងប្រហែល ៤០ ជីហ្គាវ៉ាត់ម៉ោងនៃការផ្ទុកថាមពលដែលត្រូវលក់នៅទូទាំងពិភពលោក។ ជាមួយនឹងរោងចក្រសៀងហៃថ្មី Tesla នឹងទាញយកអត្ថប្រយោជន៍ពីខ្សែសង្វាក់ផ្គត់ផ្គង់ថ្មឈានមុខគេក្នុងពិភពលោករបស់ប្រទេសចិន ដើម្បីបង្កើនទិន្នផល និងកាត់បន្ថយការចំណាយលើដុំថ្មលីចូម-អ៊ីយ៉ុង Megapack របស់ខ្លួន ដើម្បីបំពេញតម្រូវការកើនឡើងនៃការផ្ទុកថាមពលទូទាំងពិភពលោក នៅពេលដែលពិភពលោកផ្លាស់ប្តូរទៅប្រើប្រាស់ថាមពលកកើតឡើងវិញកាន់តែច្រើន។ ក្រុមហ៊ុនបានចាប់ផ្តើមផលិតរថយន្ត Model 3 នៅក្នុងទីក្រុងសៀងហៃតាំងពីឆ្នាំ ២០១៩ ហើយឥឡូវនេះមានសមត្ថភាពផលិតរថយន្តចំនួន ២២០០០ គ្រឿងក្នុងមួយសប្តាហ៍៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា
