សៀមរាប៖ ព័ត៌មានពិស្តារពាក់ព័ន្ធករណីជនដៃដល់បាញ់ក្នុងគ្រួសារនៅក្រុងសៀមរាប បណ្តាលឱ្យ ស្លាប់២នាក់ របួសធ្ងន់២នាក់កាលពីថ្ងៃទី៧ ខែមេសានោះ គឺផ្តើមចេញពីរឿងរ៉ាវចាញ់ក្តីនៅតុលាការ។
សមត្ថកិច្ចបានឱ្យដឹងថា ករណីបាញ់ប្រហារទៅលើអតីតប្រពន្ធនិងប្អូនថ្លៃប្រុសឱ្យស្លាប់ទាំង២នាក់ ជាមួយបងថ្លៃស្រីរបួសធ្ងន់និងខ្មាន់កាំភ្លើងបាញ់ខ្លួនឯងក៏របួសធ្ងន់នោះ គឺផ្តើមចេញពីរឿងគំនុំកាលពីអំឡុងឆ្នាំ២០២២ ដោយហេតុចាញ់ក្តីនៅតុលាការ។ខណៈតុលាការបានកាត់ចែកទ្រព្យសម្បត្តិឱ្យទៅខាងប្រពន្ធនិងកូន។
ជនសង្ស័យបានបាញ់នៅទីតាំងផ្សេងគ្នា។ទី១-អតីតប្អូនថ្លៃប្រុសបាញ់ស្លាប់ក្នុងផ្ទះនិងទី២-អតីតប្រពន្ធបាញ់ស្លាប់នៅផ្សារលើធំថ្មី។ក្រោយមកបន្តបាញ់បងថ្លៃស្រីឱ្យរបួសធ្ងន់ ហើយបានបាញ់ខ្លួនឯងបណ្តាលឱ្យរបួសធ្ងន់ដែរ។ រហូតមកដល់ម៉ោងជិត៤រសៀលថ្ងៃដដែលនេះ ជំនាញកំពុងសង្គ្រោះនៅមន្ទីរពេទ្យខេត្តសៀមរាប ។
ប្រភពដដែលបានបន្តថា ជនដៃដល់ឈ្មោះថា លៀងហៃ អាយុ៤៣ឆ្នាំ អ្នកលក់បន្លែ ស្រុកកំណើតនៅខេត្តកំពង់ចាម។បច្ចុប្បន្ននៅភូមិតាវៀន សង្កាត់សាលាកំរើក ក្រុងសៀមរាប របួសធ្ងន់។ចំណែកអតីតប្រពន្ធដែលស្លាប់ឈ្មោះ យ៉ង់ ផល្លី អាយុ៤២ឆ្នាំ មានកូនប្រុសស្រី២នាក់ក្នុងបន្ទុក។រីឯបងថ្លៃស្រីឈ្មោះ យ៉ង់ មុំ អាយុ៤៧ឆ្នាំ អ្នកលក់បន្លែ និងអតីតប្អូនថ្លៃប្រុសឈ្មោះ ហាក់ ណារ៉ុង អាយុ៣៨ឆ្នាំ។ ជនរងគ្រោះទាំង៣នាក់ កន្លែងកំណើតស្រុកស្អាង ខេត្តកណ្តាល បច្ចុប្បន្ននៅភូមិសង្កាត់ខាងលើ។
អ្នកស្លាប់ទាំង២នាក់ ត្រូវសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យ រីឯស្ត្រីរងរបួសកំពុងសង្គ្រោះបន្ទាន់។ចំពោះជនដៃដល់ត្រូវសមត្ថកិច្ចដាក់ខ្នោះជាប់នឹងគ្រែក្នុងមន្ទីរពេទ្យ ហើយបន្តចាត់ការតាម នីតិវិធី៕ដោយ៖វិចិត្រ
