ដោយ៖ សហការី
ត្បូងទទឹម១គ្រាប់ដ៏ធំបានដាក់ដេញថ្លៃក្នុងតម្លៃជាង ៣០លានដុល្លារ ក្នុងទីក្រុងញូវយ៉ក នៅរដូវក្តៅនេះ កំពុងមានការចាប់អារម្មណ៍យ៉ាងខ្លាំង។
បើយោងតាមការចុះផ្សាយរបស់ mail online កាលពីថ្ងៃទី ៦ ខែមេសា ឆ្នាំ ២០២៣ បានឲ្យដឹងថា ត្បូងដ៏ធំមួយនេះគេបានរកឃើញកាលពីខែកក្កដា ឆ្នាំ ២០២២ នៅប្រទេស ម៉ូសំប៊ិក ក្នុងអណ្តូងរ៉ែមួយកន្លែង ដែលគ្រប់គ្រងដោយក្រុមហ៊ុន Fura គឺជាក្រុមហ៊ុនរុករករ៉ែ មានមូលដ្ឋាននៅទីក្រុងឌូបៃ។
ត្បូងនេះមានទំហំ ៥៥.២២ការ៉ាត់ ពិតជាធំមិនធម្មតា វាមិនត្រឹមតែមានទំហំដ៏ធំហើយកើតចេញពីធម្មជាតិសុទ្ធល្អប៉ុណ្ណោះទេ វាថែមទាំងធ្វើឲ្យហាងដាក់តាំងត្បូងនេះផ្ទុះភាពល្បីល្បាញថែមទៀតផង។ ត្បូងទទឹមមួយនេះត្រូវបានគេដាក់ឈ្មោះតាមភាសា ព័រទុយហ្គាល់ ថា Estrela de Fura Fura Star។ ស្ថាប័ណ្ណ Sotheby’s បានធ្វើការប៉ាន់ស្មានតម្លៃត្បូងនេះថាមានតម្លៃថ្លៃជាង ៣០លានដុល្លារអាម៉េរិក។
ការរកឃើញត្បូង Estrela de Fura មានគេគិតថា វាមានតែនៅឯប្រទេសភូមាប៉ុណ្ណោះទេ ដែលមានត្បូងទទឹមមានពណ៌ភ្លឺច្បាស់បែបនេះ។ អ្នកវិភាគមួយចំនួនបាននិយាយដែរថា ការរកឃើញ ‘ម្តងម្កាលក្នុងមួយសតវត្ស’ កំពុងធ្វើឲ្យរំជើបរំជួលនៅក្នុងឧស្សាហកម្មរ៉ែត្បូង។
បច្ចុប្បន្ននេះ ត្បូងទទឹមធម្មជាតិទំហំ ៥៥.២២ ការ៉ាត់ បានបំបែកកំណត់ត្រាថ្មី មិនត្រឹមតែសម្រាប់ត្បូងទទឹមម៉ូសំប៊ិក ប៉ុណ្ណោះទេ គឺសម្រាប់ត្បូងទទឹមទូទៅលើសាកលលោក។
ប្រធានក្រុមហ៊ុន Sotheby’s Jewelry America លោក Quig Bruning បានថ្លែងថា ការរកឃើញត្បូងនេះបានធ្វើឲ្យមានការផ្លាស់ប្តូរទស្សនៈយល់ដឹងអំពីត្បូងអាហ្វ្រិក ដែលធ្វើឱ្យគេផ្តល់តម្លៃសមភាពជាមួយនឹងត្បូងភូមា។ មន្ទីរពិសោធន៍ Gubelin Gem Lab ដែលជាមន្ទីរពិសោធន៍មួយក្នុងចំណោមមន្ទីរពិសោធន៍ពីរផ្សេងគ្នា បានផ្តល់ចំណាត់ថ្នាក់ដល់ត្បូងហើយនិយាយថា ទំហំ និងគុណភាពនៃត្បូងទទឹមនេះ គឺ ‘ធ្វើឲ្យយើងស្ទើរតែស្មានមិនដល់សោះឡើយ’ ៕
