ដោយ៖ សហការី
![](https://cambodiaflashnews.com/wp-content/uploads/2021/06/top-banner.gif)
យុវជនក្មេងជាងគេបំផុតក្នុងពិភពលោកដែលបានសម្រេចក្តីសុបិនរបស់ខ្លួន ដោយធ្វើដំណើរកម្សាន្ដនៅជុំវិញទ្វីបអឺរ៉ុបតែម្នាក់ឯង ជាប់កំណត់ត្រាពិភពលោក Guinness។
ក្មេងប្រុសជនជាតិអាម៉េរិក Rio Matsuoka នៅក្នុងអាយុ ១៨ឆ្នាំ ១០១ថ្ងៃ បានក្លាយជាមនុស្សក្មេងជាងគេបំផុតលើពិភពលោក ដែលអាចធ្វើដំណើរកម្សាន្តទៅគ្រប់ប្រទេសជុំវិញទ្វីបអឺរ៉ុប។
ការសម្រេចចិត្តរបស់គាត់ធ្វើឡើងនៅថ្ងៃខួបកំណើតគម្រប់ ១៨ឆ្នាំ គាត់បានចាប់ផ្តើមរៀបគម្រោងសម្រាប់ដំណើរកម្សាន្តមួយនេះ ដើម្បីសម្រេចក្តីសុបិនរបស់ខ្លួន និងចង់ជាប់កំណត់ត្រាពិភពលោក។
យុវជន Rio ពន្យល់ថា “ពិតណាស់វាជារឿងចៃដន្យមួយដែលខ្ញុំបានសម្រេចចិត្តសាកល្បងបំបែកកំណត់ត្រាពិភពលោក”។ “ហើយខ្ញុំប្រាប់គ្រួសារខ្ញុំថា ខ្ញុំចង់ធ្វើដំណើរទៅអឺរ៉ុបបន្ទាប់ពីខ្ញុំបញ្ចប់កាសិក្សានៅវិទ្យាល័យ ហើយនៅខណៈពេលដែលកំពុងធ្វើការសិក្សាស្រាវជ្រាវ ខ្ញុំក៏នឹកឃើញថា តើមាននរណាម្នាក់ដែលមានវ័យក្មេងជាងគេបានទៅលេងគ្រប់ប្រទេសនៅអឺរ៉ុបហើយបានបំបែកឯតទគ្គកម្មពិភពលោកហើយឬនៅ ដូច្នេះខ្ញុំចង់បំបែកកំណត់ត្រានេះ។
យុវជនរូបនោះបានធ្វើដំណើរតែម្នាក់ឯងតាមការគ្រោងទុក នៅពេលធ្វើដំណើរគាត់បានបង្កើតមិត្តភក្តិជាច្រើននៅតាមផ្លូវ ហើយគាត់សង្ឃឹមថានឹងបានជួបគ្នាម្តងទៀតនៅក្នុងពេលឆាប់ៗខាងមុខ។ ការធ្វើដំណើររបស់គាត់បានចាប់ផ្តើមទៅកាន់ប្រទេសអ៊ីស្លង់ដ៏ត្រជាក់ និងពោរពេញដោយទេសភាពប្លែកៗមុនគេ ហើយក៏បានបញ្ចប់វានៅប្រទេសម៉ាល់តា។ ភាគច្រើនគាត់បានធ្វើដំណើរឆ្លងកាត់អឺរ៉ុបខាងលិចដោយជិះរថភ្លើង និងភាគច្រើននៃអឺរ៉ុបខាងកើតដោយការជិះរថយន្តក្រុង ហើយបានជិះយន្តហោះទៅកាន់ប្រទេសមួយចំនួនដូចជារុស្ស៊ី និងចក្រភពអង់គ្លេសជាដើម។
យុវជនអាម៉េរិកម្នាក់នេះបានឲ្យដឹងទៀតថា នៅក្នុងអំឡុងពេញធ្វើដំណើរនោះរូបគេក៏បានជួបបញ្ហាដែរ តែគេបានប្រាប់ខ្លួនឯងថាត្រូវតែតស៊ូនិងទៅមុខជានិច្ច។ នៅក្នុងវ័យត្រឹមអាយុ ១៨ឆ្នាំ Rio មានអារម្មណ៍ថា ការធ្វើដំណើរនេះបានជួយឲ្យគាត់មានភាពចាស់ទុំ និងស្គាល់ខ្លួនឯងកាន់តែច្បាស់។ គាត់និយាយថា “ខ្ញុំបានសិក្សាច្រើនអំពីខ្លួនខ្ញុំ អំពីអ្វីដែលខ្ញុំចូលចិត្តធ្វើ ក៏ដូចជាការយល់ដឹងបន្ថែមកាន់តែច្រើនអំពីពិភពលោកដ៏ពិតប្រាកដមួយ។ ខ្ញុំគិតថាការធ្វើដំណើរមើលពិភពខាងក្រៅនោះ រឿងធំបំផុតសម្រាប់ខ្ញុំ គឺការឈ្វេងយល់អំពីស្ថានភាពលំបាកដែលជាឱកាសឲ្យខ្ញុំចេះសម្របខ្លួន” ៕