ភ្នំពេញ៖អាវុធហត្ថភ្នំពេញបានឃាត់ខ្លួនបុរសម្នាក់ ករណីចេញសែកស្អុយតាមបណ្តឹងស្ត្រីជាម្តាយមីង ហើយបញ្ជូនទៅតុលាការ កាលពីរសៀលថ្ងៃទី៥ ខែមេសា និងកំពុងបន្តនីតិវិធី។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា ជនសង្ស័យឈ្មោះ ស៊ុ សូលីដា ភេទប្រុស អាយុ៣៩ឆ្នាំ ស្នាក់នៅសង្កាត់ទឹកល្អក់ទី២ ខណ្ឌទួលគោក ។ការឃាត់ខ្លួនបុរសខាងលើ ផ្នែកជំនាញបានអនុវត្តតាមដីកាបញ្ជាឱ្យចូលខ្លួនរបស់ព្រះរាជអាជ្ញារងរាជធានីភ្នំពេញ។
តាមដីកាបញ្ជាឲ្យចូលខ្លួនបានបញ្ជាក់ថា បុគ្គលឈ្មោះ ស៊ុ សូលីដា ត្រូវបង្ហាញខ្លួននៅតុលាការឱ្យបានមុនថ្ងៃទី១១ ខែមេសាឆ្នាំ២០២៣ ដើម្បីសាកសួរពីដំណើររឿងចេញសែកអត់លុយ។ជនសង្ស័យត្រូវបានតំណាងអយ្យការ កំពុងបើកការស៊ើបសួររហូតដល់រសៀលថ្ងៃទី៦ ខែមេសា មិនទាន់បានបញ្ចប់នៅឡើយ។
ដើមហេតុនៃការឃាត់ខ្លួននេះ ត្រូវស្ត្រីម្នាក់អះអាងជាម្តាយមីង ហើយបានប្រាប់សមត្ថកិច្ចថា គឺផ្តើមចេញពីរឿងចងការប្រាក់ ដែលក្មួយស៊ុ សូលីដា ខ្ចីលុយដើម្បីយកទៅធ្វើដើមទុនរកស៊ី ។ក្រោយមកមុខរបរក៏ខាតបង់ហើយមិនបានបង្វិលប្រាក់ឱ្យវិញទាន់ពេលវេលា តែបានបង់ការប្រាក់ជាបន្តបន្ទាប់។
ក្នុងនោះឈ្មោះស៊ុសូលីដា បានដាក់ប្លង់ដីមានតម្លៃប្រហាក់ប្រហែល២ម៉ឺនដុល្លារនិងបានចេញមូលប្បទានបត្រមួយសន្លឹកតម្កល់ឱ្យមានការជឿទុកចិត្ត។ប៉ុន្តែពេលយកទៅបើកលុយ ខាងធនាគារបានប្រាប់ថា“សែកនេះអត់មានលុយទេ”។ក្រោយមកម្ចាស់លុយដែលជាម្តាយមីងបានប្តឹងសមត្ថកិច្ចឱ្យចាប់ខ្លួនក្មូយដើម្បីចាត់ការតាមច្បាប់តែម្តង៕ដោយ៖វិចិត្រ