ដោយៈផាវី
![](https://cambodiaflashnews.com/wp-content/uploads/2021/06/top-banner.gif)
ភ្នំពេញ៖កម្ពុជារក្សាបាននូវអត្រាប្តូរប្រាក់រៀលយ៉ាងល្អប្រសើរ បើទោះជាស្ថិតក្នុងវិបត្តិកូវីដ-១៩ និងវិបត្តិហិរញ្ញវត្ថុសកលយ៉ាងណាក្តី និងបានជួយរួមចំណែករក្សាស្ថិរភាពថ្លៃ និងការពារអំណាចទិញរបស់ប្រាក់រៀលដល់ប្រជាជនរស់នៅតាមបណ្តាខេត្តនិងតំបន់ជនបទនេះជាការលើកឡើងរបស់លោកស្រីបណ្ឌិត ជា សិរី ទេសាភិបាលរងធនាគារជាតិនៃកម្ពុជា។
ក្នុងឱកាសខួបលើកទី៤៣ នៃការដាក់ឱ្យចរាចរប្រាក់រៀលឡើងវិញ នៅថ្ងៃទី ៥ខែ មេសានៅខេត្តព្រះសីហនុ លោកស្រីបណ្ឌិត ជា សិរី បានមានប្រសាសន៍ថានៅក្នុងរយៈពេលប្រមាណ២៥ឆ្នាំកន្លងមកនេះអត្រាប្តូរប្រាក់រៀលដែលជារូបវត្ថុកម្ពុជាត្រូវបានរក្សាឱ្យមានស្ថិរភាពបានយ៉ាងល្អប្រសើរជាមួយអត្រាមធ្យម៤.០៣៦ រៀលក្នុងមួយដុល្លារអាមេរិក គិតចាប់តាំងពីឆ្នាំ១៩៩៨មកទោះបីជាមានការប្រែប្រួលក៏ស្ថិតក្នុងរង្វង់តែត្រឹម១% ប៉ុណ្ណោះក្នុងមួយឆ្នាំ។
លោកស្រីបណ្ឌិត ជា សិរី បានបន្តថា ស្ថិរភាពអត្រាប្តូរប្រាក់ បានរួមចំណែករក្សាស្ថិរភាពថ្លៃ និង ការពារ អំណាចទិញរបស់ប្រាក់រៀល ជាពិសេសប្រាក់ចំណូលរបស់មន្រ្តីរាជការ និង ប្រជាជនរស់នៅតាមខេត្តនិងតំបន់ជនបទ ដែលមានប្រាក់ចំណូលចម្បងជាប្រាក់រៀល។
លោកស្រី ទេសាភិបាលរងបានបញ្ជាក់ថា ក្រោមទស្សនវិស័យលើកកម្ពស់ការប្រើប្រាស់ប្រាក់រៀល រាជរដ្ឋាភិបាលនិងធនាគារជាតិនៃកម្ពុជាបានសហការយ៉ាងជិតស្និទ្ធជាមួយភាគីពាក់ព័ន្ធ ដើម្បីគាំទ្រតម្រូវការប្រាក់រៀល និងធ្វើឱ្យប្រាក់រៀលកាន់តែងាយស្រួលប្រើប្រាស់នៅក្នុងជីវភាពរស់នៅប្រចាំថ្ងៃ ក៏ដូចជាសម្រាប់អាជីវកម្ម។
លោកស្រី បណ្ឌិត ជា សិរី បានបន្តទៀតថា នៅក្នុងរយៈពេល២៥ឆ្នាំចុងក្រោយនេះ ដោយការកិច្ចខិតខំប្រឹងប្រែងរបស់រាជរដ្ឋាភិបាល និងធនាគារជាតិនៃកម្ពុជា ប្រាក់រៀល ចរាចរណ៍បានកើនឡើង ជាលំដាប់ក្នុងអត្រាកំណើនប្រចាំឆ្នាំ ១៦,៦%៕