ដោយ៖ សហការី
លោក Paul Slosar មកពី Summerville រដ្ឋ South Carolina សហរដ្ឋអាម៉េរិក គឺជាបុរសម្នាក់មានពុកមាត់ប្រវែងវែងជាងទារកអាយុ៤ខែ ដោយគាត់មិនបានកាត់រយៈពេល៣០ឆ្នាំ កំពុងផ្ទុះការចាប់អារម្មណ៍យ៉ាងខ្លាំង។
Paul ជាជនជាតិអាម៉េរិក ដែលមានពុកមាត់វែងត្រូវបានគេទទួលស្គាល់ថា មានប្រវែងវែងជាងគេលើមនុស្សប្រុសទាំងឡាយក្នុងពិភពលោក។ ពុកមាត់ស្តាយបែបអង់គ្លេសនេះមានប្រវែងដល់ទៅ ៦៣.៥ សង់ទីម៉ែត្រ ស្មើ (២ហ្វីត ១អ៊ីង) ។ គាត់ធ្លាប់បានចូលរួមក្នុងការប្រកួតដណ្តើមយកពានរង្វាន់ពុកចង្កា និងពុកមាត់ថ្នាក់ជាតិនៅទីក្រុង Casper រដ្ឋ Wyoming សហរដ្ឋអាម៉េរិក កាលពីថ្ងៃទី ១២ ខែវិច្ឆិកា ឆ្នាំ ២០២២ និងកម្មវិធីផ្សេងទៀតទទួលបានជ័យជម្នះជាបន្តបន្ទាប់។
នៅក្នុងការធ្វើឲ្យពុកមាត់ដុះ moustache ដែលជាការប្រកួតប្រជែងពុកមាត់មួយ ត្រូវបានកំណត់យកត្រឹមតែរោមដុះនៅលើបបូរមាត់តែប៉ុណ្ណោះ ដែលប្រវែងអតិបរមាចាប់ពី ១.៥ សង់ទីម៉ែត្រលើសពីចុងបបូរមាត់ខាងលើ។ ថ្ងៃមួយគាត់ត្រូវបានគេជ្រើសរើសនៅឯព្រឹត្តិការណ៍ម៉ូតូក្នុងស្រុកមួយនាទីក្រុង Tacoma រដ្ឋ Washington ហើយត្រូវបានគេស្នើសុំឱ្យចូលរួមក្នុងការប្រកួតប្រជែងពុកមាត់។ លោក Paul បាននិយាយថា “នៅឯពិព័រណ៍ខោនធី មានបង្ហាញប្រភេទពុកមាត់ និងប្រភេទពុកចង្កាមួយចំនួន”។ ដោយសារវាជាការប្រកួតពុកមាត់លើកដំបូងរបស់គាត់ លោកក៏គិតថាពេលប្រកួតរួចហើយគាត់ក៏ចាកចេញបាន។ គាត់បាននិយាយទៀតថា “ក្រោយមកគេប្រាប់ថា ខ្ញុំឈ្នះពានរង្វាន់ Best of Show ហើយថាខ្ញុំត្រូវនៅបន្ត” ។
ក្រោយមកគាត់បានផ្លាស់ទៅរស់នៅទីក្រុង Charleston រដ្ឋ South Carolina ក្នុងឆ្នាំ ២០១១ Paul បានជួបបុរសម្នាក់ឈ្មោះ Paul Roof បានស្នើឱ្យគាត់ចូលរួមប្រកួតក្នុងកម្មវិធី World Beard and Mustache Championships នៅក្នុងខែកញ្ញា ២០១៧ ដែលធ្វើឡើងនៅទីក្រុង Austin រដ្ឋ Texas។
គេបានប៉ាន់ប្រមាណថា ពុកមាត់បុរសខាងលើមានប្រវែងប្រហែលទារកអាយុ៤ខែ វាជាមោទកភាពមួយសម្រាប់ Paul ដែលបានរក្សាទុកពុកមាត់បានយ៉ាងល្អឥតខ្ចោះអស់រយៈពេលជាងបីទសវត្សរ៍ចុងក្រោយនេះ។ Paul និយាយថា “ខ្ញុំធ្លាប់ទុកពុកមាត់ឲ្យខ្លី តែថ្ងៃមួយបន្ទាប់ពីខ្ញុំកោរពុកមាត់រួច ខ្ញុំបានទៅថើបប្រពន្ធរបស់ខ្ញុំ នាងក៏ត្អូញត្អែរ ហើយច្រានខ្ញុំចេញ” ។ ក្រោយមកខ្ញុំមិនដែលកោរពុកមាត់ទេ ហើយក៏ទុកវាឲ្យដុះឡើង រួចខ្ញុំក៏ចាំមើលថាវានឹងដុះឡើងយូរប៉ុនណាវែងប៉ុនណា ដែលមកទល់នឹងពេលនេះមានរយៈពេល៣០ឆ្នាំហើយ៕
