ភ្នំពេញ៖ក្មេងតូចមួយក្រុមបាននាំគ្នាចុះលេងទឹកស្រះក្នុងវត្ត បណ្តាលឱ្យលង់លិចបាត់ម្នាក់ បង្កភ្ញាក់ផ្អើលនៅវត្តស្ងួនពេជ្រ សង្កាត់កន្ទោក ខណ្ឌកំបូល កាលពីរសៀលថ្ងៃទី៥ ខែមេសា។
![](https://cambodiaflashnews.com/wp-content/uploads/2021/06/top-banner.gif)
អ្នកភូមិបានឱ្យដឹងថា ក្រោយពីមានហេតុការណ៍កើតឡើង កម្លាំងអង្គភាព៩១១ បានចេញអន្តរាគមន៍ដោយបោះខ្សែពួររាវរកក៏ទាក់សពតែម្តង។ក្មេងប្រុសរងគ្រោះបាត់បង់ជីវិតឈ្មោះ វាសនា រ៉ាយុទ្ធ អាយុ៩ឆ្នាំ នៅបុរីពិភពថ្មីកំបូល៣ ភូមិថ្មដា សង្កាត់កន្ទោក ខណ្ឌកំបូល។
ឪពុកក្មេងរូបនោះបានឱ្យដឹងថា នៅព្រឹកថ្ងៃកើតហេតុ កូនរបស់គាត់សុំគាត់មកលេង សង្ក្រាន្តនៅសាលារៀនស្ងួនពេជ្រ។ដល់ម៉ោង១១ព្រឹកដោយមិនឃើញទៅផ្ទះវិញ គាត់ក៏តាមរកតែមិនឃើញ។ បុរសជាឪពុកបានបន្តថា លុះរសៀលថ្ងៃដដែលស្រាប់តែ ឃើញកង់និងស្បែកជើងកូន នៅមាត់ស្រះក្នុងវត្តស្ងួនពេជ្រតែមិនឃើញកូន។
ពេលនោះក៏បានប្រាប់សមត្ថកិច្ចនិងកម្លាំងអង្គភាព៩១១មកជួយអន្តរាគមន៍។ជំនាញបានបោះខ្សែពួរដើម្បីរាវរកឃើញក្មេងរងគ្រោះស្លាប់បាត់ទៅហើយ។ក្រោយមកសពត្រូវបានសមត្ថកិច្ចប្រគល់ឱ្យឪពុកម្តាយយកទៅធ្វើបុណ្យ៕ដោយ៖វិចិត្រ