អ្នកស្រុករាប់រយនាក់នៃទីក្រុងភាគខាងលិចអ៊ុយក្រែន បាននាំគ្នាចូលរួមកាន់ទុក្ខម្ចាស់ជើងឯកប្រដាល់ សេរីពិភពលោក៤សម័យកាល លោក Vitalii Merinov បន្ទាប់ពីត្រូវបានពលីក្នុងសកម្មភាព ប្រយុទ្ធជាមួយទាហានរុស្ស៊ី។
យោងតាមសារព័ត៌មានរ៉យទ័រ ការកាន់ទុក្ខនេះបានធ្វើឡើងនៅទីក្រុង Ivano-Frankivsk ភាគខាងលិច ប្រទេសអ៊ុយក្រែន កាលពីថ្ងៃអង្គារទី ៤ ខែមេសា ឆ្នាំ២០២៣។ ទង់ជាតិអ៊ុយក្រែនត្រូវបានគ្របលើមឈូសរបស់លោក ខណៈដែលវាត្រូវបានគេយកចេញពីព្រះវិហារ។ ពលរដ្ឋបានលុតជង្គង់នៅតាមផ្លូវក្នុងពេលដង្ហែបុណ្យសព ដោយកាន់ទង់ជាតិអ៊ុយក្រែន និងបាច់ផ្កា។ លោក Taras Mstyslav ជាមិត្ត បាននិយាយថា “ចំពោះវីរបុរសនៃប្រទេសអ៊ុយក្រែន Vitalii Merinov សូមលើកតម្កើងសិរីរុងរឿង” ។ ម្តាយ និងប្រពន្ធរបស់ Merinov បានស្រក់ទឹកភ្នែកក្នុងពិធីបុណ្យសព ក៏ដូចជាអ្នកកាន់ទុក្ខជាច្រើននាក់ ខណៈដែលកូនស្រីអាយុ ២ ឆ្នាំរបស់គាត់ឈ្មោះ Leia បាននិយាយលាឪពុករបស់នាង ជាលើកចុងក្រោយ។
គួរជម្រាបថា លោក Merinov អាយុ៣២ ឆ្នាំ ដែលជាជើងឯកប្រដាល់អ៊ុយក្រែននេះ បានស្លាប់នៅក្នុង មន្ទីរពេទ្យមួយកាលពីសប្តាហ៍មុន បន្ទាប់ពីគាត់បានរងរបួសធ្ងន់ធ្ងរក្នុងការប្រយុទ្ធជាមួយរុស្ស៊ី នៅតំបន់ខេត្ត Luhansk ភាគខាងកើតជាប់នឹងខេត្តដូណេត៕
ប្រភព៖ REUTERS
ប្រភពរូប៖AFP
ប្រែសម្រួល៖សុខ តុលា
