វិមានក្រឹមឡាំងនិយាយថា សមាជិកភាពរបស់ហ្វាំងឡង់នៅក្នុងសម្ព័ន្ធអង្គការណាតូ គឺមានន័យស្មើនឹងការវាយប្រហារផលប្រយោជន៍សន្តិសុខរបស់រុស្ស៊ីហើយ។
នេះគឺជាសារព្រមានចុងក្រោយរបស់រុស្ស៊ីទៅលើហ្វាំងឡង់ដែលទើបតែទទួលបានសិទ្ធិយល់ព្រមពីប្រទេសតួកគីនាពេលថ្មីៗនេះក្នុងការចូលជាសមាជិកផ្លូវការរបស់អង្គការណាតូ។ សារព្រមានត្រូវបានប្រកាសដោយអ្នកនាំពាក្យវិមានក្រឹមឡាំងលោក Dmitry Peskov កាលពីថ្ងៃអង្គារទី ៤ ខែមេសា ឆ្នាំ២០២៣។ Peskov បានប្រាប់អ្នកយកព័ត៌មានថា សមាជិកភាពរបស់ហ្វាំងឡង់ បានកំពុងចាប់ផ្តើមធ្វើការវាយលុកលើសន្តិសុខរបស់យើង តំណាងឱ្យ “ភាពធ្ងន់ធ្ងរចុងក្រោយនៃស្ថានភាព”។ “ការពង្រីកអង្គការណាតូ គឺជាការវាយលុកលើសន្តិសុខរបស់យើង និងផលប្រយោជន៍ជាតិរបស់រុស្ស៊ី”។
Peskov បានបន្ថែមថា “នេះបង្ខំឱ្យយើងចាត់វិធានការតបត… ក្នុងន័យយុទ្ធសាស្ត្រ”។ លោកមិនបានផ្តល់ព័ត៌មានលម្អិតបន្ថែមថាតើនឹងប្រើយុទ្ធសាស្រ្តបែបណាដាក់ហ្វាំងឡង់ឡើយ។ ហ្វាំងឡង់បានក្លាយជាសមាជិកទី ៣១ នៃអង្គការណាតូកាលពីថ្ងៃអង្គារ ក្នុងការផ្លាស់ប្តូរយុទ្ធសាស្ត្រជាប្រវត្តិសាស្ត្រ ដែលត្រូវបានបង្ខំចិត្តឲ្យចូលដោយសារតែការវាយលុកឈ្លានពានរបស់ទីក្រុងមូស្គូទៅលើអ៊ុយក្រែន៕
ប្រភព៖ AFP
ប្រភពរូប៖AFP
ប្រែសម្រួល៖សុខ តុលា
