ដោយៈសិរីមតី
![](https://cambodiaflashnews.com/wp-content/uploads/2021/06/top-banner.gif)
ភ្នំពេញ៖ ខេត្តរតនគិរីបានត្រៀមដីចំនួន១.៤០០ហិកតាសម្រាប់អភិវឌ្ឍន៍ព្រលានយន្តហោះថ្មី ស្ថិតនៅក្នុងស្រុកលំផាត់ នៃខេត្តរតនគីរី។នេះបើតាមការឱ្យដឹងរបស់លោកញ៉ែម សំអឿន អភិបាលខេត្តរតនគីរី។
នៅក្នុងសន្និសីទសារព័ត៌មានស្ដីពី “ភាពជោគជ័យរយៈពេល ៥ឆ្នាំកន្លងមក របស់រដ្ឋបាលខេត្តរតនគិរី” រៀបចំឡើងដោយអង្គភាពអ្នកនាំពាក្យរដ្ឋាភិបាល កាលពីថ្ងៃទី៤ខែមេសា លោកញ៉ែម សំអឿន បានមានប្រសាសន៍ថា៖“ដីដែលរដ្ឋបានត្រៀម កាលពីមុននោះគឺបានក្លាយជាទីប្រជុំជន កណ្ដាលទីក្រុងទៅហើយ ដូចច្នេះវាមិនអាចសាងសង់ជាព្រលានយន្តហោះបានទេ។ទីតាំងព្រលានយន្តហោះ ដែលតត្រូវត្រៀមសាងសង់នាពេលខាងមុខ ត្រូវលើកទៅទីតាំងផ្សេងដែលមានទំហំធំជាង។ដោយឡែកទីតាំងចាស់នេះ សម្រាប់ធ្វើជាសួនកម្សាន្តសម្រាប់ពលរដ្ឋក្នុងតំបន់នោះ នឹងត្រូវត្រៀមសាងសង់វិមានឯករាជ្យ ក្នុងខេត្តរតនគីរីផងដែរ ។
លោកអភិបាលខេត្តបានបន្តថា ព្រលានយន្តហោះខេត្តរតនគីរីនេះដែរ គឺបានសិក្សាចប់ហើយ ហើយក៏បានអញ្ជើញមន្ត្រីជំនាញខាងអាកាសចរស៊ីវិល មកពិនិត្យមើលបន្ថែមទៀត ដែលអាចនឹងត្រូវសាងសង់ពេលណាមួយនោះ គឺត្រូវពិនិត្យជាបន្តបន្ទាប់ទៀត។
លោកញ៉ែម សំអឿនបានបន្ថែមថាទីតាំងត្រៀមសម្រាប់កសាងព្រលានយន្ដហោះថ្មីនេះគឺស្ថិតនៅចន្លោះរវាងខេត្តមណ្ឌលគីរីខេត្តស្ទឹងត្រែង ខេត្តក្រចេះ និងខេត្តរតនគីរី។ ទីតាំងនេះប្រកបដោយសក្ដានុពលខ្ពស់ដោយមានចម្ងាយប្រមាណ១០០គីឡូម៉ែត្រពីទីរួមខេត្តរតនគិរី។ យ៉ាងណាក្ដី ថ្វីត្បិតតែដីសម្រាប់ត្រៀមសាងសង់ ព្រលានយន្តហោះអន្តរជាតិ នៅក្នុងខេត្តរតនគីរីបានត្រៀមរួចហើយក្ដី តែមកដល់ពេលនេះ នៅតែមិនទាន់មានក្រុមហ៊ុនណា បានដាក់ទុនសម្រាប់អភិវឌ្ឍន៍ គម្រោងព្រលានយន្តហោះនេះនៅឡើយទេ ហើយលោករំពឹងថាក្រោយស្ថានភាពសេដ្ឋកិច្ចបានប្រសើរ នឹងមានក្រុមហ៊ុនចូលទៅកាន់តំបន់នោះ ដើម្បីសិក្សាពីការដាក់ទុនវិនិយោគ ។
លោកអភិបាលខេត្តរតនគិរីបង្ហាញក្ដីរំពឹងថា នៅពេលខេត្តរបស់ខ្លួនមានព្រលានយន្ដហោះថ្មីនោះ នឹងទទួលបានអ្នកវិនិយោគកាន់តែច្រើនបន្ថែមទៀត ហើយជាផ្នែកមួយក្នុងការជួយរុញ កំណើនសេដ្ឋកិច្ចសង្គម សេដ្ឋកិច្ចគ្រួសាររបស់ប្រជាពលរដ្ឋក្នុងមូលដ្ឋាន៕