ចំណែកនៅបង់ក្លាដែសវិញ អគ្គិភ័យបានឆាបឆេះផ្សារលក់សម្លៀកបំពាក់ដ៏ពេញនិយមបំផុតមួយក្នុងរដ្ឋធានី បណ្ដាលឲ្យអាជីវករស្លុតចិត្តក្រោយពីបាត់បង់ទ្រព្យសម្បត្តិស្ទើរទាំងស្រុង។
មន្ត្រីសេវាពន្លត់អគ្គិភ័យក្នុងស្រុក លោកRafi Al Faruk បានប្រាប់ទីភ្នាក់ងារសារព័ត៌មាន The Associated Press តាមទូរសព្ទថា ភ្លើងបានចាប់ផ្តើមឆេះនៅផ្សារលក់ សម្លៀកបំពាក់ Banga Bazar ដ៏ពេញនិយម ក្នុងទីក្រុង Dhaka នៅម៉ោង ៦ និង១០ ព្រឹក ម៉ោងក្នុងស្រុក ថ្ងៃអង្គារទី៤ខែមេសា ឆ្នាំ២០២៣។ អ្នកនាំពាក្យនាយកដ្ឋានពន្លត់អគ្គិភ័យ លោក Rakibul Islam បានប្រាប់ទីភ្នាក់ងារព័ត៌មាន AFP ថា៖ “អ្នកពន្លត់អគ្គិភ័យប្រហែល ៦០០ នាក់កំពុងធ្វើការដើម្បីគ្រប់គ្រងភ្លើង”។ ឧទ្ធម្ភាគចក្រកងទ័ពអាកាសបានចូលរួមខំប្រឹងពន្លត់ភ្លើង ដោយរូបភាពពីលើអាកាសពីឧបករណ៍បានបង្ហាញពីមនុស្សរាប់រយនាក់កំពុងមើលភ្លើងឆេះពីលើស្ពានអាកាសក្បែរនោះ។
យោងតាមប្រភពដដែល គេមិនទាន់បានឃើញមានរបាយការណ៍ភ្លាមៗពីអ្នកស្លាប់ និងរងរបួសនោះទេ ដឹងត្រឹមថាទ្រព្យសម្បត្តិអាជីវករ និងតំបន់ពាណិជ្ជកម្មនៅជាប់គ្នាចំនួនបីត្រូវបានឆេះស្ទើរតែទាំងស្រុង។ ចំណែកមូលហេតុនៃការឆេះក៏កំពុងត្រូវបានស៊ើបអង្កេតផងដែរ។ គួរដឹងថា អគ្គិភ័យតែងតែកើតឡើងនៅកន្លែងពាណិជ្ជកម្មក្នុងប្រទេសបង់ក្លាដែសជារឿយៗ ដោយសារតែខ្វះខាតការត្រួតពិនិត្យ និងការរៀបចំសុវត្ថិភាពការពារអគ្គិភ័យ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
