រដ្ឋាភិបាលកូរ៉េខាងត្បូងនៅដើមសប្តាហ៍នេះ បានចេញសេចក្តីប្រកាសព្រមានពីអាកាសធាតុស្ងួត ខណៈភ្លើងបានលេបត្របាក់ព្រៃឈើទូទាំងប្រទេស។
ទីភ្នាក់ងារសារព័ត៌មាន Yonhap បាននិយាយថា ភ្លើងឆេះព្រៃបានផ្ទុះឡើងនៅទូទាំងប្រទេសកូរ៉េខាងត្បូងកាលពីថ្ងៃអាទិត្យដើមខែមេសានេះ ដោយសារតែអាកាសធាតុស្ងួត និងខ្យល់បក់នៅនិទាឃរដូវ។ ទីភ្នាក់ងារសារព័ត៌មាន Yonhap បាននិយាយដោយដកស្រង់សម្តីពីសេវាព្រៃឈើកូរ៉េ (KFS) ។ យោងតាមគេហទំព័រព័ត៌មានភ្លើងឆេះព្រៃតាមពេលវេលាពិតរបស់ KFS បានឱ្យដឹងថា ភ្លើងឆេះព្រៃសរុបចំនួន ៣០ បានកើតឡើងនៅទូទាំងប្រទេសនៅម៉ោង ៣និង៣០នាទីរសៀលម៉ោងក្នុងស្រុក អាជ្ញាធរអគ្គិភ័យបានបញ្ជូនឧទ្ធម្ភាគចក្រ ១៧ គ្រឿង និងមន្ត្រីជាង ១.៦០០ នាក់ ដើម្បីពន្លត់ ហើយមានតែ ១៥កន្លែងប៉ុណ្ណោះដែលត្រូវបានពន្លត់។ ជាក់ស្តែងដូចជាអគ្គិភ័យដ៏ធំមួយបានកើតឡើងនៅម៉ោងជិត១២ថ្ងៃត្រង់ម៉ោងក្នុងស្រុកនៅលើភ្នំ Inwang ក្នុងទីក្រុងសេអ៊ូល ដែលជាភ្នំមួយនៅជិតទីតាំងមុននៃការិយាល័យប្រធានាធិបតីរបស់ប្រទេស។
រដ្ឋាភិបាលបានចេញការព្រមានអំពីអាកាសធាតុស្ងួតពិសេស បើទោះបីជាមិនទាន់មានសេចក្តីរាយការណ៍ថាមានមនុស្សស្លាប់ទេ ប៉ុន្តែប្រជាពលរដ្ឋប្រមាណ ១២០គ្រួសារត្រូវបានជម្លៀសចេញជាបណ្តោះអាសន្ន។ តាមប្រភពដដែល ភ្លើងឆេះព្រៃបានបំផ្លាញព្រៃឈើទំហំ ០,២៣ គីឡូម៉ែត្រការ៉េ ឬស្មើនឹងទំហំដីប្រហែលទីលានបាល់ទាត់ចំនួន ៣២៕
ប្រភព៖ XINHUA.NET
ប្រភពរូប៖XINHUA.NET
ប្រែសម្រួល៖សុខ តុលា
