តម្លៃប្រេងនៅទូទាំងពិភពលោកអាចនឹងហក់ឡើងខ្លាំង ក្រោយស្តេចប្រេងអារ៉ាប៊ីសាអូឌីតបានប្រកាស កាត់បន្ថយការផលិតខ្នាតធំគួរឲ្យភ្ញាក់ផ្អើល៥០ម៉ឺនបារែលក្នុងមួយថ្ងៃដល់ដំណាច់ឆ្នាំ២០២៣នេះ។
![](https://cambodiaflashnews.com/wp-content/uploads/2021/06/top-banner.gif)
ក្រសួងថាមពលអារ៉ាប៊ីសាអូឌីតបានចេញសេចក្តីថ្លែងការណ៍និយាយកាលពីថ្ងៃអាទិត្យទី ២ ខែមេសាថា ការកាត់បន្ថយនេះនឹងធ្វើឡើងរហូតដល់ដំណាច់ឆ្នាំ២០២៣តែម្តង ពោលគឺនឹងចាប់ផ្តើម ពីខែឧសភាតទៅ នៅក្នុងការសម្របសម្រួលជាមួយសមាជិកនៃអង្គការប្រេង OPEC។ ការកាត់បន្ថយនេះ គឺបន្ថែមលើការកាត់បន្ថយដែលបានប្រកាសកាលពីខែតុលាមុន ដែលធ្វើឲ្យរដ្ឋបាលលោក Biden ខឹងសម្បា ឈឺក្បាលយ៉ាងខ្លាំងដោយសារតម្លៃប្រេងទូទាំងសកលលោកបានឡើងថ្លៃកប់ពពក។ ក្រសួងបានពណ៌នាចំណាត់ការនេះថាជា “វិធានការប្រុងប្រយ័ត្ន” ក្នុងគោលបំណងរក្សាស្ថិរភាពទីផ្សារប្រេង។ បើទោះជាការកាត់បន្ថយនេះតំណាងឱ្យតិចជាង ៥ភាគរយ នៃផលិតកម្មជាមធ្យមរបស់ប្រទេស អារ៉ាប៊ីសាអូឌីតដែលមានចំនួន១១.៥លានបារ៉ែលក្នុងមួយថ្ងៃក្នុងឆ្នាំ២០២២ក៏ដោយ តែវាបានធ្វើឲ្យ មានការព្រួយបារម្ភរួចទៅហើយទៅលើអ្នកប្រើប្រាស់ ពិសេសអ្នកឃ្លាំមើលទីផ្សារប្រេងវាយតម្លៃថា វាអាចនឹងជាហានិភ័យនៃការកើនឡើងតម្លៃខ្លាំងម្តងទៀតនៅទូទាំងពិភពលោក ខណៈក្រោយការប្រកាសមិនបាន២៤ម៉ោងផង តម្លៃប្រេងម៉ាកល្បីៗហក់ឡើងជិត៦%ទៅហើយ។
តម្លៃប្រេងកាន់តែខ្ពស់គួរឲ្យបារម្ភ នឹងជួយបំពេញថវិការបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន នៅពេលដែលប្រទេសរបស់លោកធ្វើសង្រ្គាមលើអ៊ុយក្រែន និងបង្ខំជនជាតិអាម៉េរិក និងអ្នកផ្សេងទៀតឱ្យបង់ប្រាក់កាន់តែច្រើន ចំពេលអតិផរណាដែលបង្កឡើងដោយជម្លោះនោះ។ វាក៏ទំនងជាធ្វើឱ្យទំនាក់ទំនងកាន់តែតានតឹងជាមួយសហរដ្ឋអាម៉េរិកផងដែរ។
ចាប់តាំងពីសង្រ្គាមបានចាប់ផ្តើមមក ក្រុមហ៊ុនប្រេង Aramco ដែលជាក្រុមហ៊ុនប្រេងរដ្ឋរបស់ប្រទេសអារ៉ាប៊ីសាអូឌីតបានប្រកាសពីប្រាក់ចំណេញកប់ក្តោងសរុបដល់ទៅ ១៦១ ពាន់លានដុល្លារធៀបនឹងឆ្នាំ២០២១៕
ប្រភព៖ ALJAZEERA
ប្រែសម្រួល៖សុខ តុលា