ដោយៈសិរីមតី
ភ្នំពេញ៖ BNI Alliance កាលពីចុងសប្តាហ៍នេះ បានធ្វើពិធីផ្ទេរតំណែងប្រធានថ្មី អាណត្តិទី៥ ។លោក សយ សូឌីណា នាយកប្រតិបត្តិគ្លីនិកកោះនរា បានទទួលតំណែងថ្មីគឺប្រធាន BNI Alliance សម្រាប់អាណត្តិឆ្នាំ២០២៣នេះ ជំនួសលោក ភួន វីរៈ ម្ចាស់ក្រុមហ៊ុន Power Vision Energy Co.,Ltd ដែលជាអតីតប្រធានBNI Alliance អាណត្តិទី៣និងទី៤។
BNI ជាបណ្ដាញធុរកិច្ចដ៏ធំលំដាប់ថ្នាក់ពិភពលោក និងជាវេទិកាប្រមូលផ្ដុំម្ចាស់អាជីវកម្មគ្រប់ប្រភេទ ដែលអនុញ្ញាតឲ្យម្ចាស់អាជីវកម្មទាំងអស់អាចបង្កើតទំនាក់ទំនងអាជីវកម្មល្អ និងយូរអង្វែងជាមួយគ្នាទៅវិញទៅមក។ សមាជិក BNI ទាំងអស់នឹងទទួលបានការសិក្សាចំណេះដឹងនិងគន្លឹះល្អៗក្នុងការដឹកនាំអាជីវកម្ម តាមរយៈប្រព័ន្ធរបស់ BNI។
លោក សយ សូឌីណា ក្នុងនាមជាប្រធានអាណត្តិទី៥បានសន្យានិងប្តេជ្ញាថានឹងដឹកនាំChapter BNI Alliance ឲ្យកាន់តែរីកចម្រើនបន្ថែមទៀតនិងដឹកនាំ ឲ្យក្លាយទៅជាChapter ហ្គ្រីន ជាពិសេសបង្កើតឱកាសអាជីវកម្មកាន់តែច្រើនដល់សមាជិក ព្រមទាំងពង្រីកសមាជិកឱ្យបានកាន់តែច្រើនក៏ដូចជាជួយ អភិវឌ្ឍឱ្យChapterនេះឡើងដល់កម្រិតខ្ពស់។
លោកបានបន្តថា៖អាទិភាពមុនគេសម្រាប់អាណត្តិថ្មីនេះគឺការបណ្តុះបណ្តាលធនធានមនុស្សនិងលើកទឹកចិត្តសមាជិកឲ្យចូលរៀននូវវគ្គបណ្តុះបណ្តាលBNIនិងបង្កើនការដោះដូរអាជីវកម្ម(Refferal)ជូនពួកគាត់ដើម្បីបង្កើនប្រាក់ចំណូល។គិតមកដល់ពេលនេះBNI Allianceមានសមាជិក៥១នាក់ហើយនៅពេលអនាគត លោកបានប្ដេជ្ញាថានឹងបង្កើនឲ្យដល់៨៥នាក់នៅក្នុងអាណត្តិទីប្រាំនេះ។
ទាក់ទងនឹងផលប្រយោជន៍នៃការចូលជាសមាជិកBNI លោក សយ សូឌីណា បានថ្លែងឱ្យដឹងថា៖សមាជិកទាំងអស់ទទួលនូវផល ប្រយោជន៍៦ធំៗគឺ ទី១៖មានក្រុមលក់ដ៏ធំដែលមានទៅដល់៥១រូបរង់ចាំជួយសមាជិកថ្មី។ទី២៖ទទួលបានសិទ្ធិផ្ដាច់មុខអាជីវកម្ម ដែលនៅក្នុងឆេបធ័រនេះ មិនមានមុខជំនួញជាន់គ្នានោះទេ។ទី៣៖ទទួលបាននូវការដោះដូរអាជីវកម្ម(Refferal)ជារៀងរាល់សប្ដាហ៍។ទី៤៖មានបណ្ដាញទាំងនៅក្នុងស្រុកនិងអន្តរជាតិ ដែលBNI នៅកម្ពុជាមានសមាជិកប្រមាណពីរពាន់នាក់ហើយនៅលើពិភពលោកមានជាងសិបម៉ឺននាក់។ទី៥៖ ទំនាក់ទំនងអាជីវកម្មយូរអង្វែង និងទទួលបានភាពជឿជាក់ ទំនុកចិត្តលើគ្នា និងផ្តល់ឱកាសដល់គ្នាទៅវិញទៅមក និងទី៦៖ម្ចាស់អាជីវកម្មទាំងអស់ទទួលបាននូវការរៀនដើម្បីអភិវឌ្ឍអាជីវកម្ម មានការបណ្តុះបណ្តាលជារៀងរាល់ថ្ងៃជារៀងរាល់ខែនិងជារៀង រាល់ឆ្នាំ។
ប្រធាន BNI Alliance អាណត្តិទី៥ បានមានប្រសាសន៍បញ្ជាក់ថា៖បច្ចុប្បន្នBNI Alliance ជាប់លំដាប់ថ្នាក់ទីប្រាំ៦ ក្នុងចំណោមជាង៣០ Chapter។នៅពេលអនាគតមានគោលបំណងធ្វើជាChapter BNI Allianceឡើងទៅចំណាត់ថ្នាក់លេខ៣(Top 3)។
លោកបានបន្តថា៖ដើម្បីឡើងទៅលំដាប់ទី៣ សមាជិកទាំងអស់ត្រូវរួបរួមគ្នាព្យាយាមបំពេញការប្ដេជ្ញាចិត្តឲ្យបានចំនួនប្រាំ។ទីមួយ៖ចូលរួមការប្រជុំជារៀងរាល់សប្ដាហ៍។ទីពីរ៖ជំនួបផ្ទាល់មួយទល់មួយដែលជាការជួបទល់មុខគ្នារវាងម្ចាស់អាជីវកម្មដើម្បីស្គាល់គ្នារឹតតែច្បាស់និងហុចឱកាសអាជីវកម្មឲ្យគ្នាទៅវិញទៅមក។ទីបី៖ ណែនាំនិងបោះអាជីវកម្មឱ្យគ្នា។ទីបួន៖រៀនជាប្រចាំតាមរយៈAppនិងដោយផ្ទាល់។ទីប្រាំ៖អញ្ជើញភ្ញៀវឱ្យចូលរួមជាសមាជិកដើម្បីបង្កើនពី៥១ឱ្យដល់៨៥នាក់។
លោកសយ សូឌីណា ក៏បានបានថ្លែងអំណរគុណទៅដល់ អតីតប្រធាន BNI Alliance គឺលោក អ៊ុំ សារាវុធ និងលោក ភួន វារៈ ដែលបានបន្សល់នូវភាពរីក ចម្រើន ជាច្រើននៅក្នុង ឆេបធ័រ។
ពាក់ព័ន្ធនឹងអាជីវកម្មក្នុងចំណោមសាមជិក លោក សេង ចាន់រិទ្ធី អនុប្រធានBNI AllianceB បានឲ្យដឹងថា៦ខែចុងក្រោយការផ្លាស់ប្តូរអាជីវកម្មទៅវិញ ទៅមកមានជាងប្រាំបួនម៉ឺនដុល្លារ អាម៉េរិក។មានន័យថាក្នុងមួយខែអាចរកចំណូលបានប្រហែលមួយម៉ឺនប្រាំពាន់ដុល្លារ។
លោកបានឱ្យដឹងទៀតថា៖ការដោះដូរអាជីវកម្មនៅក្នុងឆេបធ័រដែលសកម្មជាងគេកន្លងមកគឺផ្នែកការរៀបចំព្រឹត្តិការណ៍និងវិស័យសាង សង់ ៕
