អ៊ុយក្រែនរៀបចំបើកការវាយផ្តាច់ក្នុងពេលឆាប់ៗនេះ ខណៈដែលទាហានស៊ីឈ្នួល រុស្ស៊ីហាក់កំពុងកឿងរុលមិនចូល វាយអ៊ុយក្រែនមិនបែកនៅក្រុងបាក់មុតសមរភូមិក្តៅលេខ១នៃខេត្តដូណេតភាគខាងកើត។
នេះដោយយោងទៅតាមលោកវរសេនីយ៍ឯក Oleksandr Syrskyi ដែលជាមេបញ្ជាការកងកម្លាំងជើងគោករបស់អ៊ុយក្រែន។ តាមការដកស្រង់ មេបញ្ជាការរូបនេះបានពន្យល់ និងផ្តល់ការកត់សម្គាល់ថា រុស្ស៊ីទទួលបានជោគជ័យតែមួយផ្នែកប៉ុណ្ណោះនៃខេត្តដូណេត។ តាមពិតទៅ “អ៊ុយក្រែនគឺនៅតែកំពុងកាន់កាប់គ្រប់គ្រងបាក់មុតដដែល”។ លោកថា “ភារកិច្ចចម្បងរបស់យើងគឺត្រូវកាត់បន្ថយកម្លាំងដ៏លើសលប់របស់សត្រូវ និងធ្វើឱ្យមានការខាតបង់យ៉ាងធ្ងន់ធ្ងរ។ នេះនឹង … បង្កើនល្បឿននៃជ័យជម្នះរបស់យើង” ។ អ្នកនាំពាក្យកងកម្លាំងបូព៌ា លោក Serhiy Cherevaty បាននិយាយថា “អង្គភាពទាហានស៊ីឈ្នួល Wagner ឥឡូវនេះត្រូវបានពង្រឹងដោយកងទ័ពជាតិរុស្ស៊ីជាប្រចាំ ដោយសារតែការខាតបង់ទាំងនេះ”។
ទីប្រឹក្សាយោធារបស់ចក្រភពអង់គ្លេស លោក Ian Stubbs បានប្រាប់អង្គការសម្រាប់សន្តិសុខ និងកិច្ចសហប្រតិបត្តិការនៅក្រុងវីយែននៅអឺរ៉ុបថា រុស្ស៊ីបានទទួលរងគ្រោះ និងរបួសយ៉ាងច្រើនណាស់នៅ Bakhmut។ “ការវាយលុករបស់ពួកគេហាក់ដូចជាជាប់គាំង របាយការណ៍បង្ហាញថា យោធារុស្ស៊ី និងក្រុមស៊ីឈ្នួល Wagner ត្រូវការជាបន្ទាន់ដើម្បីបំពេញបន្ថែមបុគ្គលិក និងស្តុកគ្រាប់បែក។ យុទ្ធជនរុស្ស៊ីប្រហែល ៣០០០០ នាក់ត្រូវបានសម្លាប់ ឬរងរបួសចាប់តាំងពីសមរភូមិ Bakhmut បានចាប់ផ្តើមកាលពី ៩ ខែមុន ខណៈក្រុមទាហានស៊ីឈ្នួលបានរុលចូលត្រឹមតែ ២៥ គីឡូម៉ែត្រប៉ុណ្ណោះ។
មជ្ឈមណ្ឌលតស៊ូជាតិរបស់អ៊ុយក្រែន បាននិយាយថា រុស្ស៊ីកំពុងស្វែងរកជួលទាហានស៊ីឈ្នួលចំនួន ២០០០នាក់ពីប្រទេសបេឡារុស ដើម្បីបំពេញបន្ថែមចំនួនអ្នកប្រយុទ្ធដែលមានបទពិសោធន៍ធ្លាក់ចុះរបស់ខ្លួន ហើយថែមទាំងបានជួលទាហានស៊ីឈ្នួលចំនួន ១០០ នាក់ពីប្រទេសអង់ហ្គោឡាផងដែរ។
ជាការវាយរំដោះនាពេលដ៏ខ្លីខាងមុខនេះ អគ្គសេនាធិការនៃកងកម្លាំងអ៊ុយក្រែនបាន ផ្តល់ការវាយតម្លៃយុទ្ធសាស្រ្តថា “ភារកិច្ចចម្បងរបស់យើងគឺត្រូវកាត់បន្ថយកម្លាំងដ៏លើសលប់របស់សត្រូវឲ្យថយចុះម្តងបន្តិចៗ និងបន្តរហូតដល់ខ្សោយខ្លាំង នោះយើងនឹងបើកការវាយរំដោះដើម្បីជ័យជម្នះរបស់យើង”។
ជុំវិញការអះអាងនេះ រុស្ស៊ីមិនបានឆ្លើយតបថ្មីទេ តែខាងមេទាហានស៊ីឈ្នួលបាននិយាយថា អ៊ុយក្រែនពិតជាកំពុងធ្វើបែបនេះមែន ដោយព្យាយាមកាត់ផ្តាច់ការប្រមូលផ្តុំទាហានរុស្ស៊ីគួរឲ្យព្រួយបារម្ភ។ បើរុស្ស៊ីមិនយកចិត្តទុកដាក់ទេ នោះនឹងត្រូវប្រឈមបរាជ័យជាមិនខាន៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
